मुक्ताईनगर ( प्रतिनिधी ) — पुर्णाड शिवारात मोकळ्या जागेत बायोडिझेलची बेकायदेशीर साठवणूक व काळाबाजार करून विक्री करतांना पुरवठा विभागाने छापा टाकून सुमारे १० लाख ७५ हजार रूपये किंमतीचा मुद्देमाल हस्तगत केला आहे. पोलिसांनी दोन जणांना अटक केली असून चार जणावर मुक्ताईनगर पोलीस ठाण्यात गुन्हा दाखल करण्यात आला.
पुर्णाड शिवारातील मुक्ताईनगर-बऱ्हाणपूर रस्त्यावर मुक्ताईनगर तोल काटा येथे राजेंद्र वाघले यांच्या मालकीच्या जागेत बायो डिझेलची साठवणूक करून त्यांची विक्री होत असल्याची गोपनिय माहिती मुक्ताईनगर पुरवठा निरीक्षकांना मिळाली. रविवारी रात्री १ वाजता पुरवठा विभागाने छापा टाकून ६ लाख ६६ हजार रूपये किंमतीचे बायोडिझेल आणि ४ लाख ९ हजार ४७० रूपयांची रोकड असा १० लाख ७५ हजार ४७० रूपये किंमतीचा मुद्देमाल हस्तगत केला आहे.
पुरवठा निरीक्षक ऋषीकेश तानाजी यांच्या फिर्यादीवरून संशयित आरोपी निलेश सपकाळे (रा. निसर्ग कॉलनी असोदा रोड जळगाव), राजेंद्र वाघले ( रा. शहापूर), रितेश दोरताणी (वय-२१ , रा. परतवाडा अचलपूर अमरावती ) , चिराग शिराठ (वय-२६ , रा. आसोदा रोड जळगाव) यांच्यावर मुक्ताईनगर पोलीस ठाण्यात गुन्हा दाखल करण्यात आला आहे. दोन जणांना अटक केली आहे. पुढील तपास पो. नि. राहूल खताळ करीत आहेत.
