मुंबई (वृत्तसंस्था) – पुण्यातील धानोरी परिसरात राहणाऱ्या महिलेसह तिच्या सहा वर्षाच्या मुलाची निर्घृण हत्या करण्यात आल्यानंतर आता या महिलेच्या पतीचा मृतदेह आढळून आला आहे. खानापूर पोलिसांना पती आबिद शेख यांचा मृतदेह सापडला आहे. सासवड आणि कात्रजच्या नवीन बोगद्याजवळ बुधवारी माय लेकांचा मृतदेह आढळून आल्यानंतर पोलीस आबिद शेखच्या मागावर असतानाच त्यांचाही मृतदेह आढळून आल्याने या प्रकरणातील गूढ आणखीन वाढले आहे.
पत्नी आलिया आणि मुलगा आयान यांचा खून केल्यानंतर बेपत्ता झालेल्या आबिद अब्दुल शेख याचा आज सकाळी खानापूर येथे नदीच्या पाण्यात मृतदेह आढळून आला आहे. खडकवासला धरणाच्या पुढे खानापूर येथे एक मृतदेह आढळून आला. तपास करता गेले काही दिवस पुणे व ग्रामीण पोलीस ज्यांचा शोध घेत होते. त्या आबिद शेख यांचा तो मृतदेह असल्याचे लक्षात आले. हवेली पोलीस आणि भारती विद्यापीठ पोलीस घटनास्थळी पोहचले आहेत.
