चाळीसगाव (प्रतिनिधी) – आमदार मंगेश चव्हाण यांच्याहस्ते चाळीसगाव तालुक्यातील २ आत्महत्याग्रस्त शेतकरी कुटुंबाना प्रत्येकी १ लाख व राष्ट्रीय कुटुंब अर्थसहाय्यता योजनेंतर्गत १९ कुटुंबाना प्रत्येकी २० हजार मदतीच्या धनादेशाचे वाटप.
कर्जबाजारीपणामुळे आत्महत्या केलेल्या चाळीसगाव तालुक्यातील भउर येथील कै.अशोक नामदेव गुंजाळ व गणेशपूर येथील कै.सुनील भिका पाटील या शेतकऱ्यांच्या कुटुंबियांना शासनातर्फे प्रत्येकी १ लाख रुपये व दारिद्य रेषेखालील कुटुंबातील १८ ते ५८ वर्ष वय असणाऱ्या कमावत्या व्यक्तीच्या मृत्युनंतर त्यांच्या वारसांना राष्ट्रीय कुटुंब अर्थसहाय्यता योजनेंतर्गत चाळीसगाव तालुक्यातील १९ कुटुंबाना प्रत्येकी २० हजार प्रमाणे ३ लाख ८० हजार रुपये मदतीचे धनादेश चाळीसगाव तालुक्याचे आमदार मंगेश चव्हाण यांच्याहस्ते वितरीत करण्यात आले.
तहसील कार्यालयात आयोजित या धनादेश वाटप कार्यक्रमास प्रांताधिकारी लक्ष्मीकांत साताळकर, तहसीलदार अमोल मोरे, पंचायत समितीचे गटनेते संजय भास्करराव पाटील, भाजपा तालुकाध्यक्ष प्रा.सुनील निकम आदी उपस्थित होते. यावेळी आमदार मंगेश चव्हाण यांनी सदर कुटुंबाना कायमस्वरूपी आधार देण्यासाठी त्यांना विधवा निवृत्तीवेतन व शासनाच्या इतर योजनांच्या माध्यमातून मदत मिळवून देण्याच्या सूचना प्रशासनाला केल्या.
