नवी दिल्ली (वृत्तसंस्था) – करोना रूग्ण बरे होण्याच्या जागतिक क्रमवारीमध्ये भारत अव्वल स्थानी असून, आतापर्यंत देशातील 54 लाख रूग्ण बरे झाले आहेत्. बरे झालेल्या रूग्णांचे जागतिक पातळीवरचे प्रमाण 21 टक्के आहे, तर त्या एकूण रूग्णांमध्ये भारताचे हे प्रमाण 18 टक्के आहे. इतर अनेक देशांच्या तुलनेत भारताचा कोविड मृत्यूदर कमी असून भारताने जागतिक क्रमवारीत आपले अव्वल स्थान कायम राखले आहे.
जागतिक स्तरावर कोविड मृत्यूदर 2.97 टक्के आहे तर भारताची तुलनात्मक आकडेवारी 1.56 टक्के आहे. भारतामध्ये दर दशलक्ष लोकसंख्येमागे 73 करोना रुग्णांचा मृत्यू झाल्याची नोंद आहे. तर जगामध्ये सरासरी दर दशलक्ष लोकसंख्येमागे 130 जणांचा मृत्यू होत असल्याची नोंद आहे.
भारतामध्ये गेल्या 24 तासांमध्ये 75 हजारांपेक्षा अधिक करोना रूग्ण बरे झाले आहेत. एका दिवसात जास्त संख्येने रूग्ण बरे होत असल्यामुळे राष्ट्रीय स्तरावरचे रूग्ण बरे होण्याचे प्रमाणही वाढत आहे. सध्या हा दर 83 टक्के आहे.
गेल्या 24 तासांमध्ये बरे झालेल्या करोनारूग्णांपैकी 74 टक्के रूग्ण 10 राज्यांमधील आहेत. यामध्ये प्रामुख्याने महाराष्ट्रामध्ये सर्वात जास्त रूग्ण असून त्या खालोखाल आंध्र प्रदेश आणि कर्नाटक राज्यांमधल्या रूग्णांचा समावेश आहे.
सलग 12 व्या दिवशी भारतामध्ये सक्रिय रूग्णांची संख्या 10 लाखांपेक्षा कमी आहे. देशात आज सक्रिय रूग्णांची संख्या 9 लाख 44 हजार 996 आहे. गेल्या 24 तासांमध्ये देशात 79,476 नव्या रूग्णांची नोंद झाली. तर गेल्या 24 तासांमध्ये 1,069 जणांचा मृत्यू झाल्याची नोंद आहे.
