इंदापूर येथील तरुणाविरुद्ध मेहुणबारे पोलिसांत पोक्सो कायद्यान्वये गुन्हा
मेहुणबारे (प्रतिनिधी) :- जळगाव जिल्ह्यातील मेहुणबारे पोलीस ठाण्याच्या हद्दीत राहणाऱ्या १५ वर्षीय अल्पवयीन मुलीवर अत्याचार झाल्याची धक्कादायक घटना उघडकीस आली आहे. या प्रकरणी पुणे जिल्ह्यातील इंदापूर तालुक्यातील घोरपडवाडी येथील एका तरुणाविरुद्ध मेहुणबारे पोलीस ठाण्यात भारतीय न्याय संहिता तसेच पोक्सो कायद्यान्वये गुन्हा दाखल करण्यात आला आहे.
पोलिसांत दाखल फिर्यादीनुसार, पीडित मुलगी आपल्या आई-वडिलांसोबत मूळ गावी शेतमजुरीचे काम करीत होती. याच परिसरात शेतमजुरीसाठी येणाऱ्या संशयित तरुणाची तिच्याशी ओळख झाली. कालांतराने या ओळखीचे मैत्रीत रूपांतर झाले. सुमारे चार ते पाच महिन्यांपूर्वी संशयिताने पीडितेला चॉकलेट खाण्यास दिले आणि शेजारील उसाच्या शेतात नेऊन तिच्याशी लग्न करण्याचे आमिष दाखवले. तसेच, तिला आवडत असल्याचे सांगून तिच्यावर अत्याचार केल्याचा आरोप फिर्यादीत करण्यात आला आहे.
त्यानंतर संबंधित ठिकाणी संशयिताने पीडितेसोबत वारंवार शारीरिक संबंध प्रस्थापित केल्याचेही तक्रारीत नमूद आहे. दरम्यान, पीडितेचे आई-वडील मजुरीच्या कामानिमित्त पुणे जिल्ह्यातील इंदापूर तालुक्यातील घोरपडवाडी येथे गेले होते. तेथे असताना ७ नोव्हेंबर २०२६ रोजी दुपारी साडेबारा वाजण्याच्या सुमारास पीडितेच्या पोटात दुखू लागल्याने तिला निमगाव केतकी येथील ग्रामीण रुग्णालयात उपचारासाठी दाखल करण्यात आले. तेथील डॉक्टरांनी तपासणीनंतर पुढील उपचारासाठी बारामती येथील वैद्यकीय महाविद्यालयात पाठविले. तेथे वैद्यकीय तपासणी केली असता पीडिता गर्भवती असल्याचे डॉक्टरांनी सांगितल्याचे फिर्यादीत नमूद आहे.
या घटनेप्रकरणी पीडितेच्या फिर्यादीवरून मेहुणबारे पोलीस ठाण्यात गुन्हा क्रमांक ३३७/२०२६ अन्वये भारतीय न्याय संहिता कलम ६४(२)(एम), ६५(१), ६४(२)(आय) तसेच पोक्सो कायदा कलम ४, ६, ८ व १२ प्रमाणे गुन्हा दाखल करण्यात आला आहे.
या प्रकरणाचा पुढील तपास पोलीस उपनिरीक्षक विकास शिरोळे करीत आहे.
