यावल ( प्रतिनिधी ) – यावल येथील ग्रामीण रुग्णालयातील आरोग्य सुविधा, स्वच्छता आणि वैद्यकीय सेवांचा दर्जा तपासण्यासाठी जिल्हास्तरीय उच्चपदस्थ वैद्यकीय अधिकाऱ्यांच्या पथकाने रुग्णालयाला भेट देत विविध विभागांची पाहणी केली. राज्याचे सार्वजनिक आरोग्य व कुटुंब कल्याणमंत्री यांच्या आगामी जळगाव जिल्हा दौऱ्याच्या पार्श्वभूमीवर ही पाहणी करण्यात आल्याने आरोग्य विभागात हालचालींना वेग आला आहे.
जिल्हा शल्यचिकित्सक कार्यालयाच्या आदेशानुसार अतिरिक्त जिल्हा शल्यचिकित्सक डॉ. शिवदास सूर्यजी चव्हाण आणि निवासी वैद्यकीय अधिकारी डॉ. दीपक विठ्ठलराव जाधव यांनी यावल ग्रामीण रुग्णालयाला भेट देऊन रुग्णालयाच्या कामकाजाची प्रत्यक्ष पाहणी केली. यावेळी रुग्णालयातील वैद्यकीय अधिकारी व कर्मचाऱ्यांकडून विविध विभागांच्या कामकाजाची माहिती जाणून घेण्यात आली.
ओपीडी, आयपीडीसह विविध विभागांची पाहणी पाहणीदरम्यान बाह्यरुग्ण विभाग (ओपीडी), आंतररुग्ण विभाग (आयपीडी), रुग्णालयाचा परिसर आणि स्वच्छतेच्या व्यवस्थेची तपासणी करण्यात आली. तसेच रुग्णांना उपलब्ध करून दिल्या जाणाऱ्या आरोग्यसेवा, वैद्यकीय उपकरणांची उपलब्धता व त्यांची कार्यस्थिती, औषधसाठा, रुग्णालयीन व्यवस्थापन आणि विविध अभिलेखांची पाहणी करण्यात आली.
त्रुटी आढळल्यास वैयक्तिक जबाबदारी रुग्णालयातील कामकाजात कोणतीही त्रुटी किंवा कमतरता आढळल्यास संबंधित अधिकारी व कर्मचाऱ्यांच्या वैयक्तिक जबाबदारीवर बोट ठेवून त्याबाबत योग्य सुधारणा करण्याच्या सूचना देण्यात आल्या. रुग्णालयातील सर्व व्यवस्था सुरळीत ठेवण्यासह आरोग्यसेवेचा दर्जा सुधारण्यावर भर देण्यात आला.
आरोग्य सुविधांमध्ये सुधारणा होणार?
या पाहणीमुळे यावल ग्रामीण रुग्णालयातील आरोग्य सुविधांचा प्रश्न पुन्हा चर्चेत आला आहे. तपासणीदरम्यान करण्यात आलेल्या सूचनांची प्रत्यक्ष अंमलबजावणी कितपत होते, रुग्णालयातील सुविधांमध्ये कोणत्या सुधारणा केल्या जातात आणि त्याचा रुग्णांना किती लाभ मिळतो, याकडे आता यावल तालुक्यातील नागरिकांचे लक्ष लागले आहे.
