मॉर्निंग वॉक ग्रुपचा स्तुत्य उपक्रम; २५ कुटुंबांना घरपोच फराळाची भेट
यावल ( प्रतिनिधी ) – दिवाळी म्हणजे आनंद, उत्साह आणि आपुलकीचा सण! या सणाचा खरा आनंद केवळ स्वतःपुरता मर्यादित न ठेवता समाजातील प्रत्येक घटकापर्यंत पोहोचविण्याच्या भावनेतून मॉर्निंग वॉक ग्रुपच्या वतीने दिवाळीच्या दिवशी एक हृदयस्पर्शी सामाजिक उपक्रम राबविण्यात आला.
बोरावल येथील दोन आदिवासी पाड्यांवर प्रत्यक्ष भेट देत ग्रुपच्या सदस्यांनी आदिवासी बांधवांसोबत दिवाळीचा आनंद द्विगुणित केला.या उपक्रमांतर्गत ग्रुपच्या सदस्यांनी आदिवासी पाड्यांवरील घराघरांत जाऊन सुमारे २० ते २५ आदिवासी कुटुंबांना लाडू, शेव, चिवडा आदी दिवाळी फराळाच्या पाकिटांचे सप्रेम भेट म्हणून वाटप केले. प्रत्येक कुटुंबापर्यंत स्वतः पोहोचून त्यांच्या आनंदात सहभागी होण्याचा प्रयत्न या सदस्यांनी केला. केवळ फराळाचे वाटप न करता आदिवासी बांधवांशी संवाद साधत त्यांच्यासोबत सणाचा आनंद वाटून घेण्यात आला.
दिवाळीच्या निमित्ताने मिळालेल्या या प्रेमाच्या भेटीमुळे आदिवासी कुटुंबांच्या आनंदात भर पडली. समाजातील वंचित आणि गरजू घटकांपर्यंत सणांचा आनंद पोहोचविण्याचा हा प्रयत्न सामाजिक संवेदनशीलतेचे दर्शन घडविणारा ठरला.
दिवाळीच्या पणत्या घराघरांत उजळतात; मात्र दुसऱ्यांच्या चेहऱ्यावर हास्य फुलविण्यातून माणुसकीचा खरा दीप प्रज्वलित होतो. मॉर्निंग वॉक ग्रुपच्या या उपक्रमाने दिवाळीच्या सणाला सामाजिक बांधिलकीची सुंदर जोड दिली असून, त्यांच्या या स्तुत्य कार्याचे परिसरातून कौतुक होत आहे.
