चाळीसगाव (प्रतिनिधी):- गावपातळीवर कायदा व सुव्यवस्था अबाधित राखण्यासाठी तसेच पोलीस आणि जनता यांच्यातील समन्वय अधिक दृढ करण्यासाठी, जळगावचे पोलीस अधीक्षक डॉ. श्रीकांत धिवरे यांच्या संकल्पनेतून चाळीसगाव ग्रामीण पोलीस ठाण्यात विशेष मार्गदर्शन व साहित्य वाटप कार्यक्रम उत्साहात पार पडला. यासोबतच पोलिसांनी तांत्रिक तपास करून शोधून काढलेले १ लाख २० हजार रुपये किमतीचे १२ हरवलेले मोबाईल फोन मूळ मालकांना परत केले.
या कार्यक्रमास चाळीसगाव परिमंडळाचे अपर पोलीस अधीक्षक अशोक नखाते व उपविभागीय पोलीस अधिकारी विजयकुमार ठाकूरवाड यांची प्रमुख उपस्थिती होती. ग्रामीण ठाण्याच्या हद्दीतील पोलीस पाटील तसेच विविध गावांमधील ग्राम सुरक्षा दलाचे सुमारे ३५० ते ४०० सदस्य या वेळी उपस्थित होते.
ग्राम सुरक्षा दल सदस्यांना साहित्य वाटप
गावातील शांतता, सुरक्षितता राखणे आणि गुन्हेगारीला आळा घालण्यासाठी ग्राम सुरक्षा दलाच्या सदस्यांना मान्यवरांच्या हस्ते टी-शर्ट, शिट्ट्या व ओळखपत्रांचे वाटप करण्यात आले. ग्राम सुरक्षा दल हा पोलीस आणि नागरिकांमधील महत्त्वाचा दुवा आहे. त्यामुळे सदस्यांनी सतर्क राहून संशयास्पद हालचालींची माहिती वेळेत पोलिसांना द्यावी, तसेच कोणताही कायदा हातात न घेता जबाबदारीने कार्य करावे, असे आवाहन पोलीस अधिकाऱ्यांनी केले.
१.२० लाखांचे १२ मोबाईल मूळ मालकांना सुपूर्द
चाळीसगाव ग्रामीण गुन्हे शोध पथकाने शासनाच्या ‘CEIR’ पोर्टलच्या माध्यमातून शोधलेले १ लाख २० हजार रुपये किमतीचे १२ मोबाईल फोन मान्यवरांच्या हस्ते त्यांच्या मूळ मालकांकडे सुपूर्द करण्यात आले. हरवलेला मोबाईल परत मिळाल्याने नागरिकांनी पोलीस प्रशासनाचे आभार मानले.
दिवाळी सणाच्या पार्श्वभूमीवर सतर्कतेचे आवाहन
दिवाळी सणानिमित्त बाहेरगावी जाताना नागरिकांनी घराची व मालमत्तेची काळजी घ्यावी, दागदागिने व रोख रक्कम सुरक्षित ठेवावी आणि घराबाबत शेजाऱ्यांना कल्पना द्यावी, तसेच संशयास्पद व्यक्ती आढळल्यास तत्काळ पोलिसांशी संपर्क साधावा, असे आवाहनही या वेळी करण्यात आले.
सदर कार्यक्रम यशस्वी करण्यासाठी सहायक पोलीस निरीक्षक विजय माळी यांच्या मार्गदर्शनाखाली पोलीस उपनिरीक्षक भगवान शिरसाठ, राहुल राजपूत, श्रीमती भारती काळे, अंमलदार महेंद्र मराठे, संदीप पाटील, दीपक गुंजाळ तसेच गुन्हे शोध पथकाचे युवराज नाईक, संदीप पाटील, विजय पाटील, बाळू बाविस्कर आदींनी परिश्रम घेतले.
