अवजड वाहतूक पाळधी तरसोद बायपासवर वळवा; रस्ते सुरक्षेसाठी जबाबदारी आणि कालमर्यादा निश्चित करण्याची अरविंद देशमुख यांची मागणी
जळगाव ( प्रतिनिधी ) – शहरातून जाणाऱ्या महामार्गावर आतापर्यंत १२ जणांचा बळी गेल्याचे निदर्शनास आले असताना, आणखी जीवितहानी होण्याची वाट न पाहता प्रशासनाने तातडीने ठोस प्रतिबंधात्मक उपाययोजना कराव्यात. पाळधी तरसोद बायपासची सुरक्षितता आणि वाहतूकक्षमता तपासून शहरातून जाणारी अवजड वाहने त्या मार्गावर वळवावीत, अशी मागणी नगरसेवक अरविंद देशमुख यांनी पोलिस अधीक्षक श्रीकांत धिवरे यांच्याकडे केली आहे. केवळ उपाययोजनांवरील चर्चेपुरते मर्यादित न राहता संबंधित विभागांची जबाबदारी आणि कामाची कालमर्यादा निश्चित करणारा कृती आराखडा तातडीने राबवावा, असेही त्यांनी निवेदनात म्हटले आहे.
देशमुख यांनी २४ ऑक्टोबर रोजी दिलेल्या निवेदनातून शहरातील महामार्गावरील अपघातांचा गंभीर प्रश्न पुन्हा उपस्थित केला आहे. या महामार्गावर आतापर्यंत १२ जणांना जीव गमवावा लागल्याचे निवेदनात नमूद करून त्यांनी पुढील दुर्घटना टाळण्यासाठी तातडीच्या कार्यवाहीची गरज अधोरेखित केली आहे. अपघातांनंतर कारवाई करण्यासोबतच अपघात घडू नयेत, यासाठी सक्षम वाहतूक नियोजन आणि रस्ते सुरक्षेची व्यवस्था उभारण्याची मागणी त्यांनी केली आहे.
पाळधी तरसोद बायपास एका बाजूने सुरू असल्याने या मार्गावरून अवजड वाहतूक सुरू करण्याच्या दृष्टीने आवश्यक तपासणी करावी. मार्गाची सुरक्षितता व वाहतूकक्षमता तपासल्यानंतर शहरातून पुढे जाणारी अवजड वाहने बायपासमार्गे वळवावीत. आवश्यकतेनुसार पोलिसांच्या नियंत्रणाखाली आळीपाळीने वाहतूक सोडण्याची व्यवस्था करावी, असा पर्यायही देशमुख यांनी सुचविला आहे. शहरातील महामार्गावरून होणाऱ्या अवजड वाहनांच्या वाहतुकीचे नियोजन करून अपघातांचा धोका कमी करण्यासाठी संबंधित यंत्रणांनी समन्वयाने निर्णय घेणे आवश्यक असल्याचे त्यांच्या निवेदनातून स्पष्ट करण्यात आले आहे.
शहराच्या प्रवेशमार्गांवर मजबूत बॅरिकेड्स उभारून नियंत्रित प्रवेशव्यवस्था करावी. त्याद्वारे अवजड वाहनांचा अनधिकृत प्रवेश रोखावा. मात्र, ही व्यवस्था करताना अत्यावश्यक सेवांना अडथळा येणार नाही, याची दक्षता घ्यावी, अशी मागणीही करण्यात आली आहे. वाहतूक नियंत्रणासाठी केलेल्या उपाययोजना प्रत्यक्षात प्रभावी ठराव्यात, यासाठी प्रवेशमार्गांवरील व्यवस्थेवर संबंधित यंत्रणांचे नियंत्रण असण्याची गरज निवेदनात मांडण्यात आली आहे.
अपघातप्रवण ठिकाणे आणि ‘ब्लॅक स्पॉट’वर रात्रीही स्पष्टपणे दिसणारे धोक्याचे इशारे, वेगमर्यादा व दिशादर्शक फलक तातडीने लावावेत. वाहनचालकांना धोकादायक ठिकाणांची पूर्वकल्पना मिळेल आणि सुरक्षितपणे वाहन चालविण्यास मदत होईल, अशा पद्धतीने ही व्यवस्था करावी. त्याचबरोबर महामार्गावरील खड्डे संबंधित यंत्रणेकडून तातडीने व टिकाऊ पद्धतीने बुजवावेत, अशी मागणी देशमुख यांनी केली आहे.
रस्ते सुरक्षेचा प्रश्न विविध विभागांशी संबंधित असल्याने पोलिस, राष्ट्रीय महामार्ग प्राधिकरण, सार्वजनिक बांधकाम विभाग, महापालिका आणि संबंधित यंत्रणांची संयुक्त बैठक घ्यावी. या बैठकीत कोणत्या विभागाने कोणते काम करायचे आणि ते किती कालावधीत पूर्ण करायचे, हे स्पष्टपणे निश्चित करावे. आणखी बळी जाण्याची वाट न पाहता जबाबदारी व कालमर्यादेसह कृती आराखडा तातडीने अमलात आणावा, अशी ठाम मागणी निवेदनात करण्यात आली आहे.
यापूर्वी अपघातांच्या अनुषंगाने संबंधितांविरुद्ध गुन्हा दाखल करण्याची कार्यवाही केल्याबद्दल देशमुख यांनी पोलिस अधीक्षकांचे आभारही मानले आहेत. त्याचवेळी पुढील जीवितहानी रोखण्यासाठी प्रतिबंधात्मक उपाययोजना तितक्याच तातडीने होणे आवश्यक असल्याचे त्यांनी नमूद केले आहे. या निवेदनावर करण्यात आलेल्या कार्यवाहीची लेखी माहिती तक्रारदाराला पुरवावी, अशी विनंतीही त्यांनी केली आहे.
निवेदनाच्या प्रती जिल्हाधिकारी, महापालिका आयुक्त, संबंधित राष्ट्रीय महामार्ग प्राधिकरण, सार्वजनिक बांधकाम विभाग आणि शहर वाहतूक शाखेला देण्यात आल्या आहेत. शहरातून जाणाऱ्या महामार्गावरील सुरक्षिततेसाठी सर्व संबंधित यंत्रणांनी एकत्रितपणे तातडीची पावले उचलावीत, अशी मागणी देशमुख यांनी केली आहे.
