नवी दिल्ली (वृत्त संस्था) – जागतिक आरोग्य संघटनेच्या म्हणण्यानुसार कोरोना व्हायरसवर जे औषध प्रभावी ठरतंय, त्या औषधांचं आता भारतात उत्पादन होणार आहे. एवढंच नाही तर त्याची विक्रीही करता येणार आहे. त्या औषधाचं नाव आहे रेमडेसिवीर. भारताच्या औषधी महानियंत्रक विभागानं या रेमडेसिवीर औषधाच्या उत्पादनासाठी हेटेरो आणि सिप्ला या दोन कंपन्यांना परवानगी दिली असल्याचे वृत्त एका वृत्तसंस्थेने दिले आहे.
रेमडेसिवीर हे औषध महाराष्ट्र सरकारलाही पाहिजे होते. त्यासाठी बांगला देशातून त्याची आयात करण्यात येणार होती. मात्र, काही कारणास्तव ही आयात थांबवण्यात आली. आता भारतातच त्याचे उत्पादन होणार असल्याने कोरोना रुग्णांसाठी ही बाब दिलासा देणारी आहे. सुत्रांच्या हवाल्याने वृत्तसंस्थेने दिलेल्या वृत्तामध्ये म्हटले आहे की, जे कोरोना पॉझिटिव्ह रुग्ण हॉस्पिटलमध्ये दाखल आहेत केवळ त्यांच्यासाठी हे औषध वापरण्यात येणार आहे.
रेमडेसिवीर औषधाचे उत्पादन आणि विक्रीसाठी हेटेरी आणि सिप्ला या कंपन्यांना परवानगी देण्यात आली आहे. शनिवारी (दि.20) औषध महानियंत्रक विभागाने या दोन कंपन्यांना उत्पादन आणि विक्री करण्याची परवानगी देण्याचा निर्णय घेतला. भारतीय औषध महानियंत्रक संस्थेनं फेविपिरावीर या औषधाच्या उत्पादन आणि वितरणासाठी ग्लेनमार्क फार्मास्युटिकल्स या कंपनीला परवानगी दिली होती. कोरोना संसर्गावर अशा प्रकारे मंजुरी मिळालेले हे पहिलेच औषध ठरले होते. आता त्यानंतर रेमडेसिवीर या औषधाच्या उत्पादनासाठीही परवानगी देण्यात आली आहे.
