हँडल लॉक तोडून अज्ञात चोरट्याने दुचाकी पळवली; अमळनेर पोलीस ठाण्यात गुन्हा दाखल
अमळनेर (प्रतिनिधी) :- अमळनेर शहरातील मुंदडा नगर परिसरात घराच्या अंगणात हँडल लॉक करून उभी केलेली दुचाकी अज्ञात चोरट्याने चोरून नेल्याची घटना उघडकीस आली आहे. या दुचाकीची किंमत सुमारे २० हजार रुपये असून, याप्रकरणी अमळनेर पोलीस ठाण्यात चोरीचा गुन्हा दाखल करण्यात आला आहे.
पोलिसांकडून मिळालेल्या माहितीनुसार, फिर्यादी मानव नितीन धनगर (वय २३) यांनी आपली हिरो फॅशन प्रो कंपनीची काळ्या रंगाची दुचाकी (क्रमांक MH-19-CT-6332) अमळनेर शहरातील मुंदडा नगर क्रमांक ३, शास्त्री नगर परिसरातील राहत्या घराच्या अंगणात हँडल लॉक करून उभी केली होती.
दि. १० ऑक्टोबर २०२६ रोजी रात्री ११ वाजेपासून ते ११ ऑक्टोबर २०२६ रोजी सकाळी ८ वाजेच्या दरम्यान अज्ञात चोरट्याने दुचाकीचे लॉक तोडून ती चोरून नेल्याचे फिर्यादीत नमूद करण्यात आले आहे. परिसरात शोध घेऊनही दुचाकी मिळून न आल्याने याप्रकरणी पोलिसांत तक्रार दाखल करण्यात आली.
या प्रकरणी दि. १७ ऑक्टोबर २०२६ रोजी अमळनेर पोलीस ठाण्यात भारतीय न्याय संहितेच्या कलम ३०३(२) अन्वये गुन्हा नोंदविण्यात आला आहे. अज्ञात आरोपीचा शोध घेण्याचे काम पोलीस करीत आहेत.
तपास सुरू
या चोरीच्या घटनेचा पुढील तपास अमळनेर पोलीस ठाण्याचे पोलीस कर्मचारी करीत असून, चोरीस गेलेली दुचाकी हस्तगत करण्यासाठी पोलिसांकडून प्रयत्न सुरू आहेत. पोलिसांच्या नोंदीनुसार, अद्याप आरोपी अज्ञात आहे.
