१७ वर्षीय विवाहितेच्या तक्रारीवरून पतीविरुद्ध पॉक्सो कायद्यान्वये कारवाई; अमळनेर पोलिसांकडून तपास सुरू
अमळनेर (प्रतिनिधी) : अमळनेर तालुक्यात अल्पवयीन विवाहितेच्या तक्रारीवरून तिच्या पतीविरुद्ध लैंगिक अत्याचारासंदर्भात गुन्हा दाखल करण्यात आला आहे. या प्रकरणी अमळनेर पोलीस ठाण्यात गुन्हा रजिस्टर क्रमांक ५४०/२०२६ अन्वये भारतीय न्याय संहितेच्या कलम ६४ तसेच बालकांचे लैंगिक अपराधांपासून संरक्षण अधिनियम (पॉक्सो) मधील कलम ४ व ६ अंतर्गत गुन्ह्याची नोंद करण्यात आली आहे.
उपचारादरम्यान दिला मुलीला जन्म
पोलिसांकडून मिळालेल्या माहितीनुसार, तक्रारदार अल्पवयीन मुलगी शिरूड, ता. अमळनेर येथील रहिवासी आहे. तिचा विवाह सुमारे एक वर्षापूर्वी पतीसोबत कुटुंबीयांच्या संमतीने झाल्याचे तक्रारीत नमूद आहे. विवाहानंतर ती गर्भवती राहिली होती.
२१ सप्टेंबर २०२६ रोजी अचानक पोटात दुखू लागल्याने तिला धुळे येथील हिरे वैद्यकीय महाविद्यालयात उपचारासाठी दाखल करण्यात आले. उपचारादरम्यान तिने नैसर्गिक प्रसूतीद्वारे एका मुलीला जन्म दिला.
तक्रारीवरून गुन्हा दाखल
पीडितेने दिलेल्या तक्रारीच्या आधारे तिच्या पतीविरुद्ध अमळनेर पोलीस ठाण्यात गुन्हा दाखल करण्यात आला आहे. अल्पवयीन मुलीशी संबंधित प्रकरण असल्याने पोलिसांकडून कायद्यानुसार पुढील तपास सुरू आहे.
या प्रकरणाचा तपास पोलीस उपनिरीक्षक कविता ठाणगे करीत आहेत. अमळनेर पोलीस ठाण्याचे प्रभारी अधिकारी पोलीस निरीक्षक दत्तात्रय निकम यांच्या मार्गदर्शनाखाली पुढील कार्यवाही सुरू आहे.
