जळगाव ( प्रतिनिधी ) – बारी समाज माध्यमिक विद्यालय, शिरसोली, ता. जि. जळगाव येथे दिनांक १३ ऑक्टोबर २०२६ रोजी मुख्याध्यापक श्री.आर.एस.आंबटकर यांच्या मार्गदर्शनाखाली शालेय विज्ञान प्रदर्शनाचे आयोजन करण्यात आले. विद्यार्थ्यांमध्ये वैज्ञानिक दृष्टिकोन, जिज्ञासू वृत्ती, संशोधनाची आवड आणि सर्जनशीलता विकसित व्हावी, हा या प्रदर्शनाचा मुख्य उद्देश होता.
या विज्ञान प्रदर्शनाचे उद्घाटन संस्थेचे अध्यक्ष मा. ॲड. निलेशभाऊ खलसे यांच्या प्रमुख उपस्थितीत झाले. याप्रसंगी प्रभारी पर्यवेक्षक श्री. एस. ए. भदाणे, ज्येष्ठ शिक्षक श्री. आर. के. पाटील, विज्ञान प्रमुख श्रीमती डी. के. पाटील तसेच विद्यालयातील सर्व विज्ञान शिक्षक उपस्थित होते.
या प्रदर्शनात लहान गटातील विद्यार्थ्यांनी १२ मॉडेल्स, तर मोठ्या गटातील विद्यार्थ्यांनी १९ मॉडेल्स सादर केली. विद्यार्थ्यांनी आपल्या कल्पकतेतून विविध वैज्ञानिक संकल्पनांवर आधारित मॉडेल्स तयार करून त्यांचे सादरीकरण केले. या प्रदर्शनातून विद्यार्थ्यांच्या वैज्ञानिक ज्ञानाला, प्रयोगशीलतेला आणि नावीन्यपूर्ण विचारांना व्यासपीठ मिळाले.
विद्यार्थ्यांनी उत्साहाने सहभाग घेत आपल्या कल्पनांचे प्रभावी सादरीकरण केले. अशा उपक्रमांमुळे विद्यार्थ्यांमध्ये विज्ञानाविषयी आवड निर्माण होऊन त्यांच्या सुप्त गुणांना वाव मिळतो, असे मत यावेळी संस्थेचे अध्यक्ष निलेश भाऊ खलसे यांनी व्यक्त केले.
या विज्ञान प्रदर्शनाच्या यशस्वितेसाठी विज्ञान प्रमुख श्रीमती डी. के. पाटील आणि सर्व विज्ञान शिक्षकांनी विशेष परिश्रम घेतले. विद्यार्थ्यांच्या उत्स्फूर्त सहभागामुळे प्रदर्शन उत्साहपूर्ण वातावरणात पार पडले.
