दारुड्या मुलाच्या छळाला कंटाळून जन्मदात्या आई-वडिलांनीच आवळला गळफास!
जळगाव (प्रतिनिधी) – एमआयडीसी पोलीस ठाण्याच्या हद्दीतील मोहाडी येथे महिनाभरापूर्वी घडलेल्या कथित आत्महत्येच्या घटनेत धक्कादायक वळण आले आहे. दारूच्या नशेत दररोज होणाऱ्या छळाला कंटाळून जन्मदाते आई-वडील आणि सख्ख्या भावानेच मिळून तरुणाचा गळफास आवळून खून केल्याचे तपासात निष्पन्न झाले आहे. ३१ जुलै २०२६ रोजी घडलेल्या या घटनेत राधेशाम हरचंद राठोड (वय २६) याने आत्महत्या केल्याचा बनाव कुटुंबीयांनी रचला होता. सुरुवातीला एमआयडीसी पोलीस ठाण्यात अकस्मात मृत्यू (एडी) दाखल करण्यात आली होती; मात्र पोलिसांच्या कसून तपासात हत्येचा हा थरार उघडकीस आला.
मयत राधेशाम राठोड याला दारूचे तीव्र व्यसन होते. तो दररोज नशेत घरी येऊन आई-वडील आणि भावाला बेदम मारहाण करून त्रास देत असे. या दैनंदिन त्रासाला कंटाळून अखेर कुटुंबाने त्याचा काटा काढण्याचा कट रचला. ३१ जुलै रोजी दुपारी दीड वाजेच्या सुमारास तिघांनी संगनमत करून राधेशामला दोरीच्या साहाय्याने गळफास देऊन ठार केले.
हत्या केल्यानंतर आरोपींनी पुरावा नष्ट करण्याच्या उद्देशाने गुन्ह्यात वापरलेली दोरी तात्काळ जाळून टाकली. त्यानंतर राधेशामने गळफास घेऊन स्वतः आत्महत्या केल्याचा खोटा कांगावा करत पोलिसांची दिशाभूल करण्याचा प्रयत्न केला. घटनास्थळाची पाहणी व परिस्थितीजन्य पुराव्यांवरून संशय बळावल्याने पोलिसांनी खाक्या दाखवताच आरोपींचा बनाव कोसळला आणि त्यांनी गुन्ह्याची कबुली दिली.
या प्रकरणी एमआयडीसी पोलीस ठाण्यात गुन्हा रजि. नं. ७०९/२०२६ अन्वये भारतीय न्याय संहिता (BNS) २०२३ चे कलम १०३(१), २३८, ३(५) नुसार हत्येचा गुन्हा दाखल करण्यात आला असून खालील संशयितांना अटक करण्यात आली आहे:
मीराबाई हरसिंग राठोड (वय – मयताची आई)
हरसिंग उर्फ हरचंद नथ्यु राठोड (वय – मयताचे वडील)
सचिन हरसिंग राठोड (वय – मयताचा भाऊ, सर्व रा. मोहाडी, ता. जि. जळगाव)
पोलिसांनी तिन्ही आरोपींना ताब्यात घेतले असून या प्रकरणाचा पुढील तपास एमआयडीसी पोलीस करत आहेत.
