तमाशाच्या कार्यक्रमात तरुणावर कड्याने हल्ला; तिघांविरुद्ध गुन्हा दाखल
कुरवेल गावातील घटना; १७ वर्षीय तरुणाच्या डोक्याला दुखापत
चोपडा | प्रतिनिधी : चोपडा तालुक्यातील कुरवेल येथे आयोजित तमाशाच्या कार्यक्रमादरम्यान किरकोळ कारणावरून १७ वर्षीय तरुणावर तिघांनी संगनमत करून हल्ला केल्याची घटना समोर आली आहे. या हल्ल्यात तरुणाच्या डोक्याला दुखापत झाली असून, चोपडा ग्रामीण पोलीस ठाण्यात तिघांविरुद्ध गुन्हा दाखल करण्यात आला आहे.
हातातील कड्याने डोक्यावर मारहाण
पोलिसांकडून मिळालेल्या माहितीनुसार, प्रणव पंकज पाटील (वय १७, रा. कुरवेल, ता. चोपडा) याने याबाबत फिर्याद दिली आहे. २३ ऑगस्ट रोजी रात्री साडेअकराच्या सुमारास कुरवेल गावात सार्वजनिक ठिकाणी तमाशाचा कार्यक्रम सुरू होता.
यावेळी कोणतेही ठोस कारण नसताना संशयित भूषण राजेंद्र कोळी, आकाश राजेंद्र कोळी आणि सोमेश सुरेश कोळी, तिघेही रा. कुरवेल, यांनी संगनमत करून प्रणव पाटील याच्यासोबत वाद घातला. त्यानंतर हातातील कड्याने त्याच्या डोक्यावर मारहाण करून जखमी केल्याचा आरोप आहे. तसेच शिवीगाळ केल्याचेही फिर्यादीत नमूद आहे.
चोपडा ग्रामीण पोलिसांत गुन्हा दाखल
या प्रकरणी प्रणव पाटील यांच्या फिर्यादीवरून चोपडा ग्रामीण पोलीस ठाण्यात भारतीय न्याय संहितेच्या कलम 118(1), 115(2), 352 व 3(5) अन्वये गुन्हा दाखल करण्यात आला आहे.
या घटनेचा पुढील तपास पोलीस कॉन्स्टेबल संदीप निळे करीत आहेत.
