सावदे येथील सरपंचांच्या घरातून रोख रकमेसह २० तोळे सोन्याचे दागिने लंपास; परिसरात खळबळ
पाळधी (ता. धरणगाव): सावदे येथील सरपंच गोपाल पवार यांच्या घरात झालेल्या चोरीच्या घटनेत चोरट्यांनी तब्बल २० तोळे सोन्याच्या दागिन्यांसह रोख रक्कम लांबविल्याचे उघडकीस आले आहे. सरपंच पवार राजस्थानवरून परत आल्यानंतर या घटनेचा पूर्ण खुलासा झाला असून, या मोठ्या धाडसी चोरीमुळे पाळधी परिसरात तीव्र खळबळ उडाली आहे.
मिळालेल्या माहितीनुसार, सरपंच गोपाल पवार हे आपल्या कुटुंबासह राजस्थान येथील खाटू श्याम यांच्या दर्शनासाठी गेले होते. घर बंद असल्याचा फायदा उठवत चोरट्यांनी कुलूप तोडून आत प्रवेश केला. पवार कुटुंबीय गावी नसल्याने नेमका किती ऐवज चोरीला गेला हे समजू शकले नव्हते.
मुसळीने फोडली तिजोरी
सरपंच पवार काल गावी परतल्यानंतर त्यांनी घरात पाहणी केली असता, घरातील तिजोरीत ठेवलेले २० तोळे सोन्याचे दागिने आणि रोख रक्कम गायब असल्याचे स्पष्ट झाले. विशेष म्हणजे, चोरट्यांनी घरातच असलेल्या मुसळीचा वापर करून तिजोरी फोडल्याचे तपासात दिसून आले आहे.
संशयितांची चौकशी सुरू
घटनेची माहिती मिळताच पाळधी पोलिसांनी घटनास्थळी धाव घेऊन पंचनामा केला व सरपंच पवार यांचा जबाब नोंदवून घेतला. दरम्यान, पाचारण करण्यात आलेले श्वान पथक संशयितरित्या घराच्या जवळ असलेल्या गल्लीतच घुटमळत होते. पाळधी पोलिसांनी याप्रकरणी दोन ते तीन संशयितांना ताब्यात घेऊन चौकशी सुरू केली असून, चोरटे लवकरच पोलिसांच्या जाळ्यात अडकतील, अशी शक्यता वर्तवली जात आहे.
