नशिराबादमध्ये मध्यरात्री धाडसी घरफोडी; झोपेत असलेल्या मायलेकांच्या घरातून ६० हजारांचा ऐवज लंपास
नशिराबाद (प्रतिनिधी) : नशिराबाद शहरातील वरची आळी परिसरातील दत्त मंदिर वाडा भागात मध्यरात्री धाडसी घरफोडीची घटना घडली. घरातील आई व मुलगा गाढ झोपेत असतानाच अज्ञात चोरट्याने दरवाजाची कडी उघडून घरात प्रवेश करत सुमारे ५० ते ६० हजार रुपयांचा ऐवज लंपास केला. या घटनेमुळे परिसरात भीतीचे वातावरण निर्माण झाले आहे.
मिळालेल्या माहितीनुसार, किरण रवींद्र माळी हे आपल्या आईसोबत राहतात. दि. ९ जुलैच्या मध्यरात्री दोघेही घरातील खोलीत झोपलेले असताना चोरट्याने दरवाजाच्या फटीतून हात घालून कडी उघडली आणि घरात प्रवेश केला. त्यानंतर शेजारच्या खोलीत ठेवलेली रोख रक्कम, पाकीट, देवघरातील देवांच्या मूर्ती तसेच विवो कंपनीचा मोबाईल असा मौल्यवान ऐवज चोरून नेला.
किरण माळी यांची आई शेतमजुरी करून उदरनिर्वाह करतात. त्यांना नुकतीच भिशी लागल्याने मिळालेली रक्कम घरात ठेवली होती. तसेच किरण माळी यांनीही रोजंदारीतून साठवलेले पैसे घरात ठेवले होते. चोरट्याने ही रक्कम व इतर साहित्य लंपास केल्याने कुटुंबाचे मोठे आर्थिक नुकसान झाले आहे.
घटनेची माहिती मिळताच कुटुंबीयांनी नशिराबाद पोलीस ठाण्यात तक्रार दिली. घरापासून काही अंतरावरील सीसीटीव्ही कॅमेऱ्यात मध्यरात्री एक संशयित तरुण परिसरात फिरताना दिसल्याची प्राथमिक माहिती समोर आली असून, त्याच्या आधारे पोलिसांनी तपास सुरू केला आहे.
घरातील व्यक्ती झोपेत असताना झालेल्या या धाडसी चोरीमुळे नागरिकांमध्ये भीतीचे वातावरण निर्माण झाले असून, रात्रीची गस्त वाढवून चोरट्यांचा लवकर शोध घ्यावा, अशी मागणी परिसरातील नागरिकांकडून करण्यात येत आहे.
