एटीएममध्ये कार्डची अदलाबदल; भुसावळच्या व्यक्तीची ८० हजारांची फसवणूक
जळगावातील स्टेट बँकेच्या मुख्य शाखेतील घटना; अज्ञाताविरुद्ध गुन्हा
जळगाव (प्रतिनिधी) : जळगाव शहरातील स्टेट बँक ऑफ इंडिया (मुख्य शाखा) येथील एटीएममध्ये एका अज्ञात व्यक्तीने बोलण्यात गुंतवून एटीएम कार्डची अदलाबदल करत भुसावळ येथील व्यक्तीच्या खात्यातून ८० हजार रुपये काढून फसवणूक केल्याची घटना उघडकीस आली आहे. याप्रकरणी जिल्हापेठ पोलीस ठाण्यात अज्ञाताविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, पुरुषोत्तम वसंत तळेले (वय ५४, रा. अष्टविनायक कॉलनी, भुसावळ) हे १० जुलै रोजी दुपारी स्टेट बँक ऑफ इंडियाच्या मुख्य शाखेतील एटीएममध्ये गेले होते. यावेळी २५ ते ३० वर्षे वयोगटातील अज्ञात व्यक्तीने त्यांना बोलण्यात गुंतवून त्यांचे एटीएम कार्ड बदलले.
त्यानंतर संबंधिताने फिर्यादीच्या बँक खात्यातून प्रत्येकी १० हजार रुपयांचे असे आठ व्यवहार करून एकूण ८० हजार रुपये काढल्याचे निदर्शनास आले. फसवणूक लक्षात आल्यानंतर पुरुषोत्तम तळेले यांनी जिल्हापेठ पोलीस ठाण्यात तक्रार दिली.
या तक्रारीवरून भारतीय न्याय संहिता (BNS) कलम ३१८(४) अन्वये अज्ञात व्यक्तीविरुद्ध गुन्हा दाखल करण्यात आला असून, पुढील तपास पोलीस करीत आहेत.
