तालुका पोलिसांची धडाकेबाज कामगिरी; स्थानिक गुन्हे शाखेला अपयश?
जळगाव ( प्रतिनिधी ) –जळगाव तालुका पोलीस ठाण्याने गेल्या काही दिवसांपासून सुरू असलेल्या घरफोडी आणि वाहनचोरीच्या घटनांना मोठा आळा घालत अवघ्या काही दिवसांत १० गुन्ह्यांची यशस्वी उकल केली आहे. या कारवाईत ५ अट्टल गुन्हेगारांना जेरबंद करत ४ लाख ३० हजार रुपयांचा मुद्देमाल हस्तगत करण्यात आला. वाढत्या घरफोड्यांमुळे नागरिकांमध्ये भीतीचे वातावरण निर्माण झाले असताना ही उल्लेखनीय कामगिरी तालुका पोलिसांनी केली असून, अशा गंभीर गुन्ह्यांच्या तपासात स्थानिक गुन्हे शाखेला अपेक्षित यश मिळत नसल्याची चर्चा पोलीस वर्तुळात रंगू लागली आहे.
जिल्हा पोलीस अधीक्षक श्रीकांत धिवरे यांनी वाढत्या घरफोडीच्या घटनांची गंभीर दखल घेत जळगाव तालुका पोलीस ठाण्याला गुन्ह्यांचा तातडीने छडा लावण्याच्या सूचना दिल्या. त्यानुसार अपर पोलीस अधीक्षक संदीप गावीत व उपविभागीय पोलीस अधिकारी नितीन गणापुरे यांच्या मार्गदर्शनाखाली पोलीस निरीक्षक शशिकांत पाटील यांनी स्वतंत्र पथके तयार करून गुप्त माहिती संकलन, तांत्रिक विश्लेषण, सीसीटीव्ही फुटेजची तपासणी आणि संशयितांवर पाळत ठेवण्याचे नियोजन केले.
गुन्हे शोध पथकाला मिळालेल्या गोपनीय माहितीच्या आधारे पोलिसांनी सापळा रचून गुरुजीतसिंग सुजानसिंग बावरी (वय २६, रा. तांबापुरा, जळगाव), दीपक बापू पाटील (वय २३, रा. पंचशील नगर, तांबापुरा), राजेश माणिक राठोड (वय २४, रा. तांबापुरा), सुमित संजय कोळी (वय १९, रा. रामेश्वर कॉलनी) आणि महेश उर्फ संतोष भोई (वय २४, रा. तांबापुरा) यांना ताब्यात घेतले.
सखोल चौकशीत आरोपींनी ९ घरफोडी आणि १ मोटारसायकल चोरी अशा एकूण १० गुन्ह्यांची कबुली दिली. त्यांच्याकडून २ लाख ३० हजार रुपयांचा चोरीचा मुद्देमाल आणि २ लाख रुपयांच्या चार मोटारसायकली असा एकूण ४ लाख ३० हजार रुपयांचा मुद्देमाल जप्त करण्यात आला.
टोळीचा मुख्य सूत्रधार गुरुजीतसिंग सुजानसिंग बावरी हा सराईत गुन्हेगार असून त्याच्याविरुद्ध एमआयडीसी पोलीस ठाण्यात ११, जिल्हापेठ पोलीस ठाण्यात १ आणि जळगाव तालुका पोलीस ठाण्यात १, असे एकूण १३ गंभीर गुन्हे दाखल आहेत. यापूर्वी त्याच्यावर एमपीडीए अंतर्गत कारवाई करून नागपूर मध्यवर्ती कारागृहात स्थानबद्ध करण्यात आले होते. कारागृहातून सुटल्यानंतर त्याने पुन्हा घरफोडीचे सत्र सुरू केले होते. मात्र तालुका पोलिसांनी त्याच्यासह संपूर्ण टोळीला जेरबंद करण्यात यश मिळवले.
ही कारवाई पोलीस निरीक्षक शशिकांत पाटील, सहाय्यक पोलीस निरीक्षक नयन पाटील, पोलीस उपनिरीक्षक विजय पाटील, प्रोबेशनरी पोलीस उपनिरीक्षक यज्ञजीता येडले, पोलीस हेड कॉन्स्टेबल प्रदीप राजपूत, गुन्हे शोध पथकातील पोलीस हवालदार अविनाश देवरे, योगेश पाटील, नरेंद्र पाटील, श्रीकांत बदर, पोलीस नाईक कैलास इंगळे, पोलीस कॉन्स्टेबल प्रशांत ठाकूर, शरद पाटील, दीपक देवरे तसेच वाहन चालक पोलीस हवालदार अशोक पाटील आणि पंकज देशमुख यांनी अत्यंत कौशल्याने पार पाडली.
तालुका पोलिसांच्या या धडाकेबाज कारवाईमुळे वाढत्या घरफोडींच्या घटनांना मोठा आळा बसण्याची अपेक्षा व्यक्त होत असून नागरिकांमध्ये पुन्हा सुरक्षिततेची भावना निर्माण झाली आहे. गुन्हेगारांच्या मुसक्या आवळण्यात जळगाव तालुका पोलिसांनी दाखविलेली तत्परता आणि प्रभावी तपासाची ही कारवाई जिल्ह्यात विशेष चर्चेचा विषय ठरत आहे.
