२२ अल्पवयीन मुलींचा शोध; २०१८ पासून बेपत्ता झालेल्यांपैकी ९५ टक्के प्रकरणे उघडकीस
जळगाव ( प्रतिनिधी ) – घरातून निघून गेलेले, हरवलेले किंवा विविध कारणांमुळे कुटुंबापासून दूर झालेल्या व्यक्तींचा शोध घेण्यासाठी जळगाव पोलिसांनी राबविलेल्या ‘ऑपरेशन शोध-४’ मोहिमेत उल्लेखनीय यश मिळाले आहे. या विशेष मोहिमेदरम्यान ३१ मुले आणि ५ अल्पवयीन मुलींसह एकूण ३६ जणांचा शोध घेऊन त्यांना त्यांच्या पालकांच्या किंवा कायदेशीर पालकांच्या स्वाधीन करण्यात आले. तसेच पोलिसांकडे नोंद असलेल्या २२ बेपत्ता मुलींचाही यशस्वी शोध लावण्यात आला.
८ ते २३ जूनदरम्यान विशेष मोहीम
महिला व बाल अपराध प्रतिबंध विभागाच्या अपर पोलीस महासंचालकांच्या निर्देशानुसार ८ ते २३ जून या कालावधीत जिल्हाभरात ‘ऑपरेशन शोध-४’ राबविण्यात आले. या मोहिमेत आश्रयगृहे, स्वयंसेवी संस्था, रेल्वे स्थानके, बसस्थानके, धार्मिक स्थळे, रुग्णालये, हॉटेल्स, दुकाने तसेच कचरा गोळा करणारी किंवा भिक्षा मागणारी मुले आढळणाऱ्या ठिकाणी तपासणी करण्यात आली. संशयित मुलांची ओळख पटवून त्यांची माहिती अद्ययावत करण्यात आली.
बेपत्ता मुलींचाही लागला शोध
अल्पवयीन मुली बेपत्ता झाल्यानंतर दाखल झालेल्या अपहरणाच्या गुन्ह्यांतील २२ मुलींचा शोध घेण्यात पोलिसांना यश आले. तसेच नोंद नसलेल्या ३१ मुलांसह ५ मुलींना शोधून त्यांच्या कुटुंबीयांच्या ताब्यात सुरक्षितपणे देण्यात आले.
९५ टक्के प्रकरणांचा छडा
जिल्ह्यात २०१८ ते २०२६ या कालावधीत २,०२७ मुले-मुली बेपत्ता झाल्याची नोंद आहे. यापैकी १,९२८ जणांचा (९५.११ टक्के) शोध जळगाव पोलिसांनी लावला असून, उर्वरित ९९ जणांचा शोध सुरू असल्याची माहिती पोलिसांनी दिली.
अधिकाऱ्यांच्या मार्गदर्शनाखाली यशस्वी मोहीम
ही मोहीम पोलीस अधीक्षक श्रीकांत धिवरे, अपर पोलीस अधीक्षक संदीप गावित, उपविभागीय पोलीस अधिकारी नितीन गणापुरे, तत्कालीन डीवायएसपी (गृह) प्रदीप ठाकूर, स्थानिक गुन्हे शाखेचे पोलीस निरीक्षक राहुल गायकवाड यांच्या मार्गदर्शनाखाली राबविण्यात आली. अनैतिक मानवी वाहतूक प्रतिबंध कक्षाचे सहायक पोलीस निरीक्षक हरिदास बोचरे, पोलीस उपनिरीक्षक दिनेश बडगुजर व त्यांच्या पथकाने ही मोहीम यशस्वी केली.
