दुर्लक्ष करणाऱ्यांवर थेट प्रशासकीय कारवाईचा इशारा; सीईओ करिश्मा नायर यांची कठोर भूमिका
जळगाव ( प्रतिनिधी ) – पंतप्रधान आवास योजना (ग्रामीण) अंतर्गत मंजूर झालेल्या आणि अपूर्ण अवस्थेत असलेल्या घरकुलांची कामे तातडीने पूर्ण करण्यासाठी ग्रामपंचायत अधिकाऱ्यांनी जबाबदारीने काम करावे. कामात दिरंगाई, टाळाटाळ किंवा निष्काळजीपणा करणाऱ्या अधिकाऱ्यांवर थेट प्रशासकीय कारवाई करण्यात येईल, असा स्पष्ट इशारा जिल्हा परिषदेच्या मुख्य कार्यकारी अधिकारी करिश्मा नायर यांनी दिला.
पाचोरा पंचायत समितीच्या सभागृहात आयोजित ग्रामपंचायत अधिकारी व ग्रामीण गृहनिर्माण अधिकाऱ्यांच्या आढावा बैठकीत त्या बोलत होत्या. बैठकीला जिल्हा ग्रामीण विकास यंत्रणेचे प्रकल्प संचालक आर. एस. लोखंडे, गटविकास अधिकारी एस. एस. मुंडे यांच्यासह संबंधित अधिकारी उपस्थित होते.
अपूर्ण घरकुलांचा सविस्तर आढावा
बैठकीत पाचोरा तालुक्यातील गावनिहाय मंजूर, पूर्ण आणि अपूर्ण घरकुलांच्या प्रगतीचा सविस्तर आढावा घेण्यात आला. पहिला व दुसरा हप्ता मिळूनही अपूर्ण राहिलेल्या घरकुलांची कारणे तपासण्यात आली. तसेच अतिक्रमण, जागेच्या समस्या किंवा इतर कारणांमुळे रखडलेल्या प्रकरणांवरही चर्चा करण्यात आली.
लाभार्थ्यांशी समन्वय साधण्याचे निर्देश
करिश्मा नायर यांनी ग्रामपंचायत अधिकाऱ्यांना प्रत्येक लाभार्थ्याशी सातत्याने संपर्क ठेवून त्यांच्या अडचणी दूर करण्याच्या सूचना दिल्या. महसूल विभाग आणि स्थानिक प्रशासनाच्या समन्वयातून अडथळे दूर करून घरकुलांची कामे तातडीने सुरू करण्याचे आदेश त्यांनी दिले.
नियमित होणार प्रगतीचा आढावा
घरकुलांच्या कामांमध्ये कोणत्याही प्रकारची हलगर्जीपणा सहन केला जाणार नसल्याचे स्पष्ट करत, कामाच्या प्रगतीचा नियमित आढावा घेतला जाईल. अपेक्षित कामगिरी न करणाऱ्या ग्रामपंचायत अधिकाऱ्यांवर थेट प्रशासकीय कारवाई केली जाईल, असा इशाराही मुख्य कार्यकारी अधिकारी करिश्मा नायर यांनी दिला.
