भुसावळ ( प्रतिनिधी ) – ई-चलनाच्या नावाखाली पाठविण्यात आलेली बनावट APK फाईल डाउनलोड केल्याने रिक्षाचालकाच्या बँक खात्यातून तब्बल २ लाख ९८ हजार ३९ रुपये परस्पर काढून घेतल्याची धक्कादायक घटना समोर आली आहे. याप्रकरणी वरणगाव पोलीस ठाण्यात अज्ञात व्यक्तीविरुद्ध फसवणूक आणि माहिती तंत्रज्ञान कायद्यान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, वरणगाव येथील रामपेठ परिसरात राहणारे सागर समाधान वाघ (वय ३२) यांच्या मोबाईलवर २७ जानेवारी २०२६ रोजी ‘RTO E-CHALLAN.apk’ नावाची फाईल व्हॉट्सॲपवर आली होती. ही फाईल मोबाईलमध्ये डाउनलोड झाल्यानंतर त्यांचा मोबाईल हॅक करण्यात आला. त्यानंतर त्यांच्या एसबीआय बँकेच्या खात्यातून ओटीपीच्या माध्यमातून परस्पर २ लाख ९८ हजार ३९ रुपये काढून घेण्यात आले.
घटनेची तक्रार दाखल झाल्यानंतर वरणगाव पोलीस ठाण्यात भारतीय न्याय संहिता कलम ३१८(४) तसेच माहिती तंत्रज्ञान कायदा २००० मधील कलम ६६(डी) आणि ४३ अन्वये गुन्हा दाखल करण्यात आला आहे. पुढील तपास पोलीस निरीक्षक आशिष आडसुळ करीत आहेत.
