अज्ञात व्यक्तीने फूस लावून पळवून नेल्याचा संशय; चोपडा शहर पोलिसांत गुन्हा दाखल
चोपडा ( प्रतिनिधी ) – चोपडा शहरातील महात्मा गांधी महाविद्यालयाच्या गेटवरून १७ वर्षीय अल्पवयीन मुलगी बेपत्ता झाल्याची घटना उघडकीस आली आहे. अज्ञात व्यक्तीने तिला फूस लावून पळवून नेल्याचा संशय व्यक्त करण्यात आला असून, याप्रकरणी चोपडा शहर पोलिस ठाण्यात गुन्हा दाखल करण्यात आला आहे.
४ जुलै रोजी सकाळी सुमारे ८ वाजेच्या सुमारास संबंधित अल्पवयीन मुलगी महात्मा गांधी महाविद्यालयात जाण्यासाठी घरातून निघाली होती. तिला महाविद्यालयाच्या गेटपर्यंत सोडण्यात आले होते. मात्र, ती महाविद्यालयात गेली नसल्याचे समोर आल्यानंतर कुटुंबीयांनी शोधाशोध सुरू केली. कुटुंबीयांनी सर्वत्र शोध घेतल्यानंतरही मुलगी आढळून न आल्याने अज्ञात व्यक्तीने काहीतरी आमिष दाखवून तिला फूस लावून पळवून नेल्याची तक्रार पोलिसांत दाखल करण्यात आली आहे.
या प्रकरणी चोपडा शहर पोलिस ठाण्यात भारतीय न्याय संहिता कलम १३७(२) अन्वये गुन्हा दाखल करण्यात आला असून, पोलिसांनी मुलीचा शोध घेण्यासाठी विशेष पथके तयार केली आहेत. परिसरातील सीसीटीव्ही फुटेजचीही तपासणी करण्यात येत आहे.
