फैजपूर ( प्रतिनिधी ) – शहरातील पठाणवाडी मशिदीजवळ स्मार्ट मीटर तपासणीचे काम सुरू असताना वीज कंपनीच्या कर्मचाऱ्यांना अडवून शासकीय कामात अडथळा निर्माण केल्याप्रकरणी चौघांविरुद्ध फैजपूर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, ६ जुलै रोजी सकाळी सुमारे ११.३० वाजेच्या सुमारास वीज वितरण कंपनीचे कर्मचारी स्मार्ट मीटर तपासणीचे काम करीत होते. यावेळी अस्लम शेख याच्यासह अन्य तीन जणांनी तेथे येऊन कर्मचाऱ्यांना काम न करण्यास सांगितले. तसेच त्यांना दमदाटी करत शिवीगाळ व धक्काबुक्की केल्याचा आरोप आहे.
या प्रकारामुळे शासकीय कामात अडथळा निर्माण झाल्याने संबंधित कर्मचाऱ्यांनी फैजपूर पोलीस ठाण्यात तक्रार दाखल केली. त्यावरून भारतीय न्याय संहिता २०२३ मधील कलम १३२ व ३५२ अन्वये गुन्हा नोंद करण्यात आला आहे. या प्रकरणाचा पुढील तपास फैजपूर पोलीस करीत आहेत.
