बुलेटच्या आवाजावरून वाद, लोखंडी काठीने डोके फोडले
मारवड (प्रतिनिधी):- हळदीच्या कार्यक्रमात बुलेटच्या सायलेन्सरचा मोठा आवाज केल्याचा जाब विचारल्याने एका तरुणावर लोखंडी काठीने प्राणघातक हल्ला केल्याची घटना तांदळी (ता. अमळनेर) येथे घडली आहे. या प्रकरणी मारवड पोलीस ठाण्यात तिघांविरुद्ध गुन्हा दाखल करण्यात आला आहे.
मिळालेल्या माहितीनुसार, तांदळी येथील संदीप हरचंद शिरसाठ (वय ३८) यांच्या घरी हळदीचा कार्यक्रम सुरू होता. ४ मे २०२६ रोजी मध्यरात्री १२:३० वाजेच्या सुमारास, गावातीलच मयूर रघुनाथ पारवे हा त्याच्या बुलेटने शिरसाठ यांच्या घरासमोर आला आणि सायलेन्सरचा कानठळ्या बसवणारा कर्कश आवाज करू लागला. संदीप शिरसाठ यांनी त्याला असा आवाज न करण्याबाबत समजावून सांगितले.
समजावून सांगितल्याचा राग आल्याने मयूर पारवे याने त्याचे वडील आणि भावाला बोलावून घेतले. त्यानंतर संशयित आरोपी रघुनाथ दगा पारवे, भूषण रघुनाथ पारवे आणि मयूर रघुनाथ पारवे या तिघांनी संगनमत करून संदीप शिरसाठ यांच्या घरात आणि अंगणात प्रवेश केला. त्यांनी शिरसाठ यांना शिवीगाळ करत चापटबुक्क्यांनी बेदम मारहाण केली. याच दरम्यान मयूर पारवे याने त्याच्या हातातील लोखंडी काठीने संदीप शिरसाठ यांच्या डोक्यावर पाठीमागून जोरदार वार केला, ज्यामध्ये ते गंभीर जखमी झाले आहेत.
या हल्ल्यानंतर संशयितांनी शिरसाठ यांना जीवे ठार मारण्याची धमकी दिली. जखमी संदीप शिरसाठ यांनी दिलेल्या फिर्यादीवरून मारवड पोलिसांनी तिन्ही आरोपींविरुद्ध गुन्हा दाखल केला आहे.
दाखल कलमे: भारतीय न्याय संहिता (BNS) च्या कलम ११८(१), ११५, ३५१(२), ३५२ आणि ३२४(४) नुसार हा गुन्हा नोंदवण्यात आला आहे.
घटनेचा पुढील तपास मारवड पोलीस ठाण्याचे सहाय्यक पोलीस निरीक्षक जीभाऊ तुकाराम पाटील आणि पोलीस उपनिरीक्षक विनोद पवार यांच्या मार्गदर्शनाखाली पोलीस हेड कॉन्स्टेबल संजय सूर्यवंशी करत आहेत. सध्या आरोपींना अटक करण्यात आलेली नाही. या घटनेमुळे गावात तणावाचे वातावरण निर्माण झाले असून सर्वत्र हळहळ व्यक्त होत आहे.
