अज्ञात वाहनचालकावर गुन्हा दाखल
पाचोरा (प्रतिनिधी):- पाचोरा-मोहाडी मार्गावरील नांद्रे गावाजवळ एका अज्ञात वाहनाने कट मारल्यामुळे झालेल्या भीषण अपघातात नाशिक येथील २५ वर्षीय तरुणाचा जागीच मृत्यू झाला. या अपघातात मृताची पत्नी आणि भाची देखील जखमी झाल्या असून, पाचोरा पोलीस ठाण्यात अज्ञात वाहनचालकाविरुद्ध गुन्हा दाखल करण्यात आला आहे.
नाशिकच्या ध्रुवनगर (गंगापूर रोड) भागात राहणारे अमित मोहनसिंग कायटे (वय २४) हे ३१ मार्च २०२६ रोजी आपल्या कुटुंबासह मोहाडी (ता. जि. जळगाव) येथून नाशिककडे आपली कार (क्रमांक एमएच २० सीएन ९३३३) घेऊन जात होते. सकाळी १०:३० ते ११:३० च्या दरम्यान नांद्रे गावाजवळील वळणावर समोरून येणाऱ्या एका अज्ञात वाहनचालकाने भरधाव वेगात येऊन अमित यांच्या कारला जोरदार कट मारला. या धडकेमुळे अमित यांचे कारवरील नियंत्रण सुटले आणि वाहन रस्त्याच्या कडेला असलेल्या खड्ड्यात जाऊन कोसळले. या भीषण अपघातात अमित कायटे यांच्या डोक्याला गंभीर दुखापत झाल्याने त्यांचा मृत्यू झाला.
या अपघातात अमित यांच्या पत्नी राधिका अमित कायटे (वय २४) आणि त्यांची भाची खुशी या दोघींनाही मार लागला असून त्या जखमी झाल्या आहेत. तसेच कारचे देखील मोठ्या प्रमाणावर नुकसान झाले आहे. याप्रकरणी राधिका कायटे यांनी दिलेल्या फिर्यादीवरून पाचोरा पोलिसांनी अज्ञात वाहनचालकाविरुद्ध गुन्हा दाखल केला आहे.
पाचोरा पोलीस ठाण्याचे पोलीस निरीक्षक राहुलकुमार पवार यांच्या मार्गदर्शनाखाली हा गुन्हा नोंदवण्यात आला असून, नोंद करण्यात आली आहे. घटनेचा पुढील तपास पोलीस नाईक हरीश गवळी करत आहेत.
