सुयश लॉन्स परिसरातील घटना
चाळीसगाव (प्रतिनिधी):- शहरात घरफोडीच्या घटनांचे सत्र सुरूच असून, सुयश लॉन्स जवळील हिरापूर रोड परिसरात एका बंद घराचे कुलूप तोडून अज्ञात चोरट्यांनी २ लाख ५३ हजार ४०० रुपयांचा मुद्देमाल लंपास केल्याची घटना उघडकीस आली आहे. याप्रकरणी चाळीसगाव शहर पोलीस ठाण्यात गुन्हा दाखल करण्यात आला आहे.
फिर्यादी आबासाहेब देवराम जाधव (वय ६२, रा. सुयश लॉन्स जवळ, हिरापूर रोड, चाळीसगाव) हे २४ मार्च ते ३० मार्च दरम्यान काही कामानिमित्त बाहेर गेले होते. यादरम्यान त्यांचे घर बंद असल्याचे पाहून अज्ञात चोरट्यांनी घराच्या दरवाजाचे कडी-कोयंडा आणि कुलूप तोडून आत प्रवेश केला. चोरट्यांनी घरातील कपाटात ठेवलेली रोख रक्कम आणि सोन्या-चांदीचे दागिने असा एकूण २,५३,४०० रुपयांचा ऐवज चोरून नेला. जाधव हे ३० मार्च रोजी सायंकाळी घरी परतल्यानंतर त्यांना घराचा दरवाजा उघडा दिसला आणि घरात चोरी झाल्याचे लक्षात आले.
या घटनेबाबत १ एप्रिल रोजी चाळीसगाव शहर पोलीस ठाण्यात रीतसर फिर्याद देण्यात आली. त्यावरून अज्ञात चोरट्याविरुद्ध गुन्हा दाखल करण्यात आला आहे. घटनेची माहिती मिळताच उपविभागीय पोलीस अधिकारी विनायक कोते आणि पोलीस निरीक्षक अमित कुमार यांनी घटनास्थळी भेट देऊन पाहणी केली. या प्रकरणाचा पुढील तपास पोलीस उपनिरीक्षक योगेश माळी हे करत आहेत.
