अशोक नगर, तारामती नगर भागात चोरट्यांचा धुमाकूळ
चोपडा (प्रतिनिधी):= शहरात चोरट्यांनी पुन्हा एकदा डोके वर काढले असून अशोक नगर, तारामती नगर आणि इंदिरा नगर भागात बंद घरांचे कुलूप तोडून तब्बल ४ लाख ८६ हजार रुपयांचा मुद्देमाल लंपास केल्याची घटना उघडकीस आली आहे. याप्रकरणी चोपडा शहर पोलीस स्टेशनमध्ये अज्ञात चोरट्यांविरुद्ध गुन्हा दाखल करण्यात आला आहे.
फिर्यादी अनिताबाई ईश्वर धनगर (वय ४९, रा. अशोक नगर) या दि. १५ मार्च २०२६ रोजी सकाळी ८ वाजेच्या सुमारास घराला कुलूप लावून बाहेर गेल्या होत्या. या दरम्यान, अज्ञात चोरट्याने त्यांच्या बंद घराचे कुलूप तोडून आत प्रवेश केला. चोरट्याने घरातील कपाटातून सोने, चांदीचे दागिने आणि रोख रक्कम असा एकूण ४ लाख ८६ हजार रुपयांचा ऐवजी चोरून नेला. केवळ अनिताबाईंच्याच घरी नव्हे, तर परिसरातील तारामती नगर आणि इंदिरा नगर भागातील इतर बंद घरांनाही चोरट्यांनी लक्ष्य केल्याचे समोर आले आहे.
या घटनेची माहिती मिळताच चोपडा शहर पोलिसांनी घटनास्थळी धाव घेऊन पंचनामा केला. अनिताबाई धनगर यांच्या फिर्यादीवरून गुन्हा दाखल करण्यात आला आहे. पुढील तपास पोलीस निरीक्षक मधुकर साळवे यांच्या मार्गदर्शनाखाली पोलीस उपनिरीक्षक चेतन परदेशी करत आहेत. भरवस्तीत झालेल्या या मोठ्या चोरीमुळे परिसरात भीतीचे वातावरण पसरले असून चोरट्यांचा लवकरात लवकर बंदोबस्त करण्याची मागणी नागरिक करत आहेत.
