पाचोरा येथे गुन्हे शाखेची सलग दुसरी कारवाई
पाचोरा ( प्रतिनिधी ) – शहरातील जारगाव चौफुली भागात हातात तलवार घेऊन दहशत निर्माण करणाऱ्या एका १९ वर्षीय तरुणाला पाचोरा पोलिसांनी अटक केली आहे. पाचोरा गुन्हे शाखेने एकाच आठवड्यात केलेली ही शस्त्रांखालील सलग दुसरी मोठी कारवाई ठरली आहे.
जळगाव जिल्ह्याचे पोलीस अधीक्षक महेश्वर रेड्डी यांनी जिल्ह्यात अवैध शस्त्र बाळगणाऱ्यांविरुद्ध कारवाई करण्याचे आदेश दिले होते. दरम्यान, पाचोरा पोलीस निरीक्षक राहुलकुमार पवार यांना गोपनीय माहिती मिळाली की, जारगाव चौफुली परिसरात एक तरुण धारदार लोखंडी तलवार घेऊन फिरत असून लोकांमध्ये दहशत पसरवत आहे. माहिती मिळताच गुन्हे शाखेच्या पथकाने सापळा रचून सोमनाथ वना पाटील (वय १९, रा. हनुमान नगर, पाचोरा) याला ताब्यात घेतले. त्याच्याकडून एक धारदार लोखंडी तलवार जप्त करण्यात आली आहे.
पोलीस कॉन्स्टेबल योगेश पाटील यांच्या फिर्यादीवरून आरोपी सोमनाथ पाटील याच्याविरुद्ध पाचोरा पोलीस स्टेशनमध्ये गुन्हा दाखल करण्यात आला आहे. ही कारवाई पोलीस अधीक्षक महेश्वर रेड्डी, अपर पोलीस अधीक्षक कविता नेरकर, उपविभागीय पोलीस अधिकारी बापू रोहम यांच्या मार्गदर्शनाखाली पार पडली. या पथकात राहुलकुमार पवार (पोलीस निरीक्षक), कृष्णा घायाळ (पोलीस उपनिरीक्षक), पोलीस कर्मचारी संदीप राजपूत, जितेश पाटील, योगेश पाटील आणि हरीश परदेशी या अधिकाऱ्यांचा व अंमलदारांचा समावेश होता.
