अडीच लाखांचा मुद्देमाल लंपास
मुक्ताईनगर (प्रतिनिधी):- तालुक्यातील पुरनाड वस्ती येथे एका बंद घराचे कडी-कोयंडा तोडून अज्ञात चोरट्यांनी सोन्याचे दागिने आणि रोख रकमेसह सुमारे २ लाख ४२ हजार रुपयांचा मुद्देमाल लंपास केल्याची घटना २२ फेब्रुवारी रोजी पहाटेच्या सुमारास घडली. या प्रकरणी मुक्ताईनगर पोलीस ठाण्यात गुन्हा दाखल करण्यात आला आहे.
फिर्यादी लक्ष्मण गोविंद दगडे (वय ४२, रा. पुरनाड वस्ती) हे आपल्या कुटुंबासह राहतात. २२ फेब्रुवारीच्या पहाटे १ ते १.३० वाजेच्या सुमारास अज्ञात दोन चोरट्यांनी त्यांच्या घराच्या मागील लाकडी दरवाजाला होल पाडून आतील कडी उघडली. चोरट्यांनी घरात प्रवेश करून लोखंडी पेटीत ठेवलेले सोन्याचे दागिने आणि रोख रक्कम चोरून नेली. एकूण २,४२,००० रुपयांचा ऐवज चोरट्यांनी लंपास केला आहे.
घटनेची माहिती मिळताच उपविभागीय पोलीस अधिकारी केदार बारबोले आणि मुक्ताईनगर पोलीस ठाण्याचे पोलीस निरीक्षक आशिषकुमार अडसूळ यांनी घटनास्थळी भेट देऊन पाहणी केली. या प्रकरणी मुक्ताईनगर पोलीस ठाण्यात गुन्हा दाखल करण्यात आला आहे. पुढील तपास पोलीस उपनिरीक्षक निलेश गोसावी करत आहेत. अद्याप या प्रकरणी कोणालाही अटक करण्यात आलेली नाही.
