जळगाव एलसीबीची कारवाई
जळगाव (प्रतिनिधी):- शहरात एकाच रात्री दोन वाईन शॉप फोडून लाखोंची रोकड लंपास करणाऱ्या सराईत चोरट्याला स्थानिक गुन्हे शाखेने अवघ्या १२ तासांत अटक करत मोठी कामगिरी बजावली आहे. तांत्रिक आणि गोपनीय माहितीच्या आधारे तपासाची चक्रे वेगाने फिरवत पोलिसांनी आरोपीला जेरबंद केले असून त्याच्याकडून मुद्देमालासह गुन्ह्यात वापरलेली मोटारसायकल जप्त करण्यात आली आहे.
जिल्हापेठ पोलीस स्टेशन हद्दीतील भजे गल्ली येथे दि. १९ फेब्रुवारी २०२६ रोजी रात्री असलेल्या ‘प्रिन्स वाईन शॉप’चे शटर तोडून अज्ञात चोरट्याने कपाटातील सुमारे २ लाख ५० हजार रुपयांची रोकड चोरून नेली होती. त्याच रात्री एमआयडीसी पोलीस स्टेशन हद्दीतील अजिंठा चौफुली परिसरातील ‘राज वाईन्स’चे शटर तोडून सुमारे १ लाख २५ हजार रुपये चोरून नेण्यात आले होते. याप्रकरणी जिल्हापेठ पोलीस ठाण्यात व एमआयडीसी पोलीस ठाण्यात गुन्हे दाखल करण्यात आले.
एकाच रात्री दोन ठिकाणी झालेल्या घरफोड्यांमुळे गुन्ह्याचे गांभीर्य लक्षात घेऊन पोलीस अधीक्षक डॉ. महेश्वर रेड्डी यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक राहुल गायकवाड व त्यांच्या पथकाने तपासाची सूत्रे हाती घेतली. तांत्रिक विश्लेषण, सीसीटीव्ही फुटेज आणि गोपनीय माहितीच्या आधारे संशयिताचा माग काढण्यात आला. अवघ्या १२ तासांत रामनिवास मंजू गुप्ता (वय ३७, रा. रामनगर, कल्याण, जि. ठाणे) याला ताब्यात घेण्यात आले.
आरोपीकडून सुमारे ३ लाख ४ हजार रुपयांचा मुद्देमाल जप्त करण्यात आला असून गुन्ह्यात वापरलेली बजाज अॅव्हेंजर मोटारसायकलही पोलिसांनी जप्त केली आहे. चौकशीत आरोपीने दोन्ही वाईन शॉपमध्ये चोरी केल्याची कबुली दिली आहे. तो मुळचा उत्तर प्रदेश येथील रहिवासी असून मुंबई, नवी मुंबई, ठाणे, मिरा-भाईंदर तसेच पुणे शहरातील विविध पोलीस ठाण्यांमध्ये त्याच्यावर घरफोडीचे गुन्हे दाखल असल्याचे तपासात निष्पन्न झाले आहे. सानपाडा, नेरुळ, काशिमीरा, नालासोपारा, कोरेगाव पार्क यांसह विविध ठिकाणी त्याच्याविरुद्ध गुन्हे नोंद आहेत.
या कारवाईत पोलीस उपनिरीक्षक शरद बागल, सहाय्यक फौजदार अतुल वंजारी, पोलीस हेड कॉन्स्टेबल विजय पाटील, नितीन बाविस्कर, अक्रम शेख, उमाकांत पाटील, किशोर पाटील, रवींद्र कापडणे, प्रशांत परदेशी तसेच नेत्रम विभागातील मुबारक देशमुख आदींचा सहभाग होता. जिल्हापेठ पोलीस ठाण्याकडील गुन्ह्याचा पुढील तपास पो.उपनिरीक्षक गोपाल देशमुख तर एमआयडीसी पोलीस ठाण्याकडील गुन्ह्याचा तपास पोहेकॉ भगवान चौधरी करीत आहेत.
