जळगावात २१ फेब्रुवारीला आयोजन
जळगाव (प्रतिनिधी): अवयवदान ही काळाची गरज असून, अवयव प्रत्यारोपणानंतरही व्यक्ती सामान्य आणि सक्रिय आयुष्य जगू शकते, हे सिद्ध करण्यासाठी जळगावमध्ये एका अनोख्या क्रीडा महोत्सवाचे आयोजन करण्यात आले आहे. आनंद हॉस्पिटल व डायलेसिस युनिट, छाया किडनी केअर अँड रिलीफ फाऊंडेशन, सुखकर्ता फाउंडेशन आणि कवयित्री बहिणाबाई चौधरी उत्तर महाराष्ट्र विद्यापीठ यांच्या संयुक्त विद्यमाने २१ फेब्रुवारी २०२६ रोजी “खान्देश ट्रान्सप्लांट गेम्स” पार पडणार आहेत.
जगभरात आणि भारतात मोठ्या शहरांमध्ये ‘पॅरालम्पिक’च्या धर्तीवर ट्रान्सप्लांट गेम्सचे आयोजन केले जाते. मात्र, खान्देशात अशा प्रकारचा उपक्रम प्रथमच राबविला जात आहे. अवयवदात्यांचे कृतज्ञतापूर्वक स्मरण करणे आणि प्रत्यारोपण झालेल्या रुग्णांच्या जिद्दीला दाद देणे, हा यामागचा मुख्य उद्देश आहे. या क्रीडा महोत्सवात केवळ खेळाडूच नाही, तर वैद्यकीय क्षेत्रातील तज्ज्ञ, नागरिक आणि विद्यार्थी मोठ्या संख्येने सहभागी होणार आहेत.
जळगावसह धुळे, नंदुरबार, नाशिक आणि बुऱ्हाणपूर जिल्ह्यातील अवयव प्रत्यारोपण झालेल्या व्यक्तींनी आणि अवयवदात्यांनी या स्पर्धेत सहभागी होऊन ‘आयुष्याची नवी सुरुवात’ साजरी करावी, असे आवाहन संयोजकांतर्फे करण्यात आले आहे. या ऐतिहासिक उपक्रमामुळे खान्देशात अवयवदानाविषयी मोठी जनजागृती होईल आणि प्रत्यारोपण झालेल्या रुग्णांना एक नवे व्यासपीठ मिळेल, असा विश्वास व्यक्त केला जात आहे.
स्पर्धेचे मुख्य आकर्षण
मैदानी खेळ : १०० मीटर धावणे, २०० मीटर रिले रन (२x), १५०० व १००० मीटर रेस वॉक.
इनडोअर गेम्स : अवयवदाते आणि प्रत्यारोपित रुग्णांसाठी विविध बैठ्या खेळांचेही आयोजन.
विद्यार्थ्यांसाठी मॅरेथॉन : विद्यापीठातील आणि इतर महाविद्यालयांतील तरुण रक्ताला या मोहिमेत जोडण्यासाठी विशेष मॅरेथॉन आयोजित करण्यात आली आहे.
