जळगाव शहरातील पंढरपूर नगरातील घटना
जळगाव ( प्रतिनिधी ) – एम.आय.डी.सी. पोलीस स्टेशन अंतर्गत येणाऱ्या पंढरपूर नगर परिसरात पैशांच्या कारणावरून एका तरुणाने कुटुंबावर जीवघेणा हल्ला केल्याची धक्कादायक घटना घडली आहे. याप्रकरणी पोलिसांनी संशयित आरोपी शंतनू चंद्रकांत गुरव (रा. हनुमान नगर, अयोध्या नगर) याच्याविरुद्ध गुन्हा दाखल केला आहे.
तक्रारदार मयूर चंद्रकांत गुरव (वय २१, रा. पंढरपूर नगर) हे आपल्या कुटुंबासह राहतात. २ फेब्रुवारी २०२६ रोजी रात्री ११:३० च्या सुमारास संशयित आरोपी शंतनू हा मयूरच्या घरी आला आणि त्याने मयूरच्या आईकडे पैशांची मागणी केली. मात्र, आईने “सध्या माझ्याकडे पैसे नाहीत” असे स्पष्ट सांगताच शंतनूचा राग अनावर झाला. शंतनूने मयूरच्या आईला अश्लील शिवीगाळ करण्यास सुरुवात केली. जेव्हा मयूर आणि त्याच्या वडिलांनी त्याला समजावण्याचा प्रयत्न केला, तेव्हा शंतनूने त्याच्या हातातील लोखंडी पाईपने मयूरच्या डोक्यावर जोरात प्रहार केला, ज्यामुळे तो गंभीर जखमी झाला.
इतकेच नव्हे तर, आरोपीने मयूरच्या आई-वडिलांनाही लाथाबुक्क्यांनी मारहाण केली आणि “तुम्हाला जिवंत सोडणार नाही” अशी धमकी देऊन तेथून पळ काढला. या घटनेनंतर मयूर गुरव याने एम.आय.डी.सी. पोलीस स्टेशन गाठून तक्रार दिली. पोलिसांनी आरोपी शंतनू गुरव विरुद्ध गुन्हा नोंदवला आहे. पोलीस हेड कॉन्स्टेबल संजीव मोरे याप्रकरणी तपास करीत आहेत.
