भुसावळ तालुक्यात साकेगाव शिवारात घटना
भुसावळ (प्रतिनिधी): जळगाव-भुसावळ राष्ट्रीय महामार्ग क्रमांक ५३ वर साकेगाव शिवारात एका अज्ञात वाहनाने धडक दिल्याने ५० ते ६० वर्ष वयोगटातील एका अज्ञात इसमाचा जागीच मृत्यू झाला आहे. अपघात घडल्यानंतर वाहनचालक मदतीसाठी न थांबता वाहन घेऊन पसार झाला असून, याप्रकरणी भुसावळ तालुका पोलीस ठाण्यात गुन्हा दाखल करण्यात आला आहे.
रविवारी दि. ८ फेब्रुवारी पहाटे ४:३० वाजण्यापूर्वी साकेगाव येथील चहाच्या दुकानासमोर हा अपघात घडला. जळगावकडून भुसावळच्या दिशेने जाणाऱ्या एका अज्ञात वाहनाने रस्त्यावरील परिस्थितीकडे दुर्लक्ष करून भरधाव वेगाने जात असताना एका पादचारी वृद्धाला जोरदार धडक दिली. या भीषण धडकेत वृद्धाला गंभीर दुखापत झाली आणि त्याचा जागीच मृत्यू झाला.मयत व्यक्तीचे नाव आणि गाव अद्याप समजू शकलेले नाही. मृताचे वय अंदाजे ५० ते ६० वर्षे आहे. अपघातानंतर संबंधित वाहनचालकाने पोलिसांना खबर न देता किंवा जखमीला मदत न करता घटनास्थळावरून पळ काढला.
याप्रकरणी साकेगावचे पोलीस पाटील गणेश शांताराम भोई (३१) यांनी दिलेल्या फिर्यादीवरून भुसावळ तालुका पोलीस ठाण्यात गुन्हा दाखल करण्यात आला आहे. पोलीस उपनिरीक्षक पूजा अंधारे या प्रकरणाचा पुढील तपास करत आहेत. भुसावळ तालुका पोलीस ठाण्याचे पोलीस निरीक्षक महेश गायकवाड यांच्या मार्गदर्शनाखाली फरार वाहनचालकाचा शोध घेतला जात आहे. महामार्गावरील सीसीटीव्ही फुटेजच्या आधारे अपघातातील वाहनाचा शोध लावण्याचे काम पोलिसांकडून सुरू आहे.
