जामनेर बसस्थानकावर घटना
जामनेर (प्रतिनिधी) : बसस्थानकावर प्रवाशांच्या गर्दीचा फायदा घेत चोरट्यांनी एका वृद्ध महिलेच्या गळ्यातील सोन्याचे मंगळसूत्र शिताफीने चोरून नेल्याची घटना घडली आहे. याप्रकरणी जामनेर पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
फिर्यादी मंगलाबाई हिरालाल जैन (वय ६९, सध्या रा. लोहगाव, पुणे, मूळ रा. भुसावळ) या दि. ८ फेब्रुवारी रोजी सकाळी ५:२० वाजेच्या सुमारास जामनेर बसस्थानकावर आल्या होत्या. त्यांना पाचोरा ते भुसावळ या मार्गावरील बसने (क्रमांक २३०६) भुसावळकडे जायचे होते. बसस्थानकावर प्रवाशांची मोठी गर्दी होती. बसमध्ये चढत असताना या गर्दीचा फायदा घेऊन एका अज्ञात चोरट्याने मंगलाबाई यांच्या गळ्यातील १८ ग्रॅम १ मिली वजनाची सोन्याची पोत (मंगळसूत्र), ज्याची किंमत सुमारे ७० हजार रुपये आहे, ती त्यांच्या संमतीशिवाय लबाडीच्या इराद्याने चोरून नेली.
चोरी झाल्याचे लक्षात येताच मंगलाबाई यांनी जामनेर पोलीस स्टेशन गाठून तक्रार दिली. त्यांच्या फिर्यादीवरून दि. ८ फेब्रुवारी रोजी रात्री २०:४७ वाजता गुन्हा दाखल करण्यात आला आहे. पोलीस हेड कॉन्स्टेबल बाळू भोई या प्रकरणाचा तपास करत आहेत. बसस्थानक परिसरात प्रवाशांनी आपल्या दागिन्यांची आणि मौल्यवान वस्तूंची काळजी घ्यावी, असे आवाहन पोलिसांकडून करण्यात आले आहे.
