भुसावळात चोरट्यांचा हैदोस
भुसावळ (प्रतिनिधी) : शहरातील बाजारपेठ पोलीस स्टेशनच्या हद्दीत चोरट्यांनी पुन्हा एकदा डोके वर काढले असून, गोपाळ नगर भागातील दोन बंद घरे फोडून सुमारे ९९,६०० रुपयांचा मुद्देमाल लंपास केला आहे. याप्रकरणी बाजारपेठ पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
डी.एल. हिंदी हायस्कूलच्या मागे असलेल्या गोपाळ नगर परिसरात राहणारे लखन सुखराज शर्मा (३७) हे दि. २४ जानेवारी ते २८ जानेवारी दरम्यान बाहेरगावी गेले होते. याच संधीचा फायदा घेऊन अज्ञात चोरट्यांनी त्यांच्या बंद घराचे कुलूप तोडून आत प्रवेश केला. चोरट्यांनी घरातील सोन्या-चांदीचे दागिने आणि २० हजार रुपये रोख असा एकूण ८५,६०० रुपयांचा ऐवज चोरून नेला. केवळ शर्मा यांचेच घर नव्हे, तर चोरट्यांनी शेजारील एका साक्षीदाराचे घरही लक्ष्य केले. दि. २७ ते २८ जानेवारीच्या दरम्यान या घरातूनही १४ हजार रुपये किमतीचे दागिने आणि २,९०० रुपये रोख असा मुद्देमाल लंपास केला. दोन्ही घरांतून एकूण ९९,६०० रुपयांची चोरी झाली आहे.
याप्रकरणी लखन शर्मा यांनी दिलेल्या फिर्यादीवरून भुसावळ बाजारपेठ पोलीस ठाण्यात गुन्हा दाखल करण्यात आला आहे.तपास अधिकारी पोलीस हेड कॉन्स्टेबल कांतीलाल केदारे या प्रकरणाचा पुढील तपास करत आहेत. शहरात चोरीच्या घटना वाढल्याने नागरिकांमध्ये भीतीचे वातावरण असून, रात्रीची गस्त वाढवण्याची मागणी करण्यात येत आहे.
