रांगोळ्या, फुलांच्या वर्षावाने उमेदवारांचे जल्लोषात स्वागत
जळगाव प्रतिनिधी : बुधवारी शिव कॉलनी परिसरातील वातावरण अत्यंत उत्साही दिसून आले. महायुतीच्या उमेदवारांच्या स्वागतासाठी महिला भगिनींनी घरासमोर आकर्षक रांगोळ्या काढल्या होत्या. पदयात्रा मार्गावर अनेक ठिकाणी उमेदवारांवर फुलांचा वर्षाव करण्यात आला, तर सुवासिनींनी उमेदवारांचे औक्षण करून विजयाचा टिळा लावला. या अभूतपूर्व प्रतिसादामुळे कार्यकर्त्यांमध्ये मोठा उत्साह संचारला आहे.
महायुतीचे अधिकृत उमेदवार चंद्रशेखर प्रकाश अत्तरदे यांच्या प्रचारार्थ काढण्यात आलेल्या पदयात्रेला शिव कॉलनी परिसरात नागरिकांनी अक्षरशः डोक्यावर घेतले. ठिकठिकाणी झालेले स्वागत आणि महिलांचा सहभाग पाहता या भागात महायुतीचे पारडे जड झाल्याचे दिसून येत आहे. यात प्रभाग ७ ‘अ’ चे दीपमाला मनोज काळे, प्रभाग ७ ‘ब’ चे अंकिता पंकज पाटील, प्रभाग ७ ‘क’ चे विशाल सुरेश भोळे, ७ ड चे चंद्रशेखर अत्तरदे या सर्व उमेदवारांनी घरोघरी जाऊन मतदारांच्या गाठीभेटी घेतल्या आणि परिसरातील विकासकामांबाबत संवाद साधला.
प्रचाराच्या या झंझावातात स्थानिक तरुण आणि निष्ठावान कार्यकर्त्यांचा मोठा फौजफाटा सहभागी झाला होता. यात प्रामुख्याने चेतन तिवारी, मनोज भंडारकर, जितेंद्र चव्हाण, रोहित भोंबे, प्रीतम गुजर, पंकज पाटील, बंटी नेरपगार यांच्यासह शेकडो कार्यकर्त्यांनी घोषणाबाजी करत संपूर्ण परिसर दणाणून सोडला.”प्रभागातील रस्ते, पाणी आणि मूलभूत सुविधांचा प्रश्न मार्गी लावणे हीच आमची प्राथमिकता आहे. केंद्र व राज्य सरकारच्या लोककल्याणकारी योजना प्रत्येक घरापर्यंत पोहोचवण्यासाठी आम्ही कटिबद्ध आहोत,” असा विश्वास चंद्रशेखर अत्तरदे यांनी यावेळी व्यक्त केला. शिव कॉलनीतील हा उत्स्फूर्त प्रतिसाद पाहता प्रभाग ७ मध्ये महायुतीची पकड अत्यंत मजबूत झाल्याचे राजकीय विश्लेषकांचे म्हणणे आहे.
