अमळनेर तालुक्यातील लोण खुर्द येथील घटना
जळगाव ( प्रतिनिधी ) – अमळनेर तालुक्यातील लोण खुर्द येथे एका बंद घराजवळ मृत अवस्थेमध्ये नवजात अर्भक आढळून आली. या प्रकरणी मारवड पोलीस स्टेशनला गुन्हा दाखल करण्यात आला आहे.
उदय निंबाजी पाटील (वय ३९, रा. लोण खुर्द ता. अमळनेर) यांनी फिर्याद दिली आहे. गुरुवारी ११ डिसेंबर रोजी दुपारी उदय पाटील हे परिवारासह शेतात काम करीत होते. त्यावेळेला त्यांना फोन आला. त्यावरून मूडी रस्त्यावर कैलास भगवान पाटील यांच्या बंद घराजवळ जखमी अवस्थेत व मृतावस्थेत नवजात अर्भक फेकून दिलेले आहे. त्यानुसार उदय पाटील व त्यांच्या पत्नी पोलीस पाटील तनुजा पाटील या घटनास्थळी पोहोचले.
अर्भकाची अवस्था अत्यंत खराब होती. तात्काळ उदय पाटील यांनी मारवड पोलीस स्टेशनला माहिती दिली. पोलिसांनी घटनास्थळी येऊन पंचनामा केला. अर्भक ग्रामीण रुग्णालय, अमळनेर या ठिकाणी दाखल करण्यात आले. उदय पाटील यांच्या फिर्यादीवरून मारवड पोलीस स्टेशनला गुन्हा दाखल करण्यात आला आहे.
