संभाजी चौकातील घटना; अकस्मात मृत्यूची नोंद
जळगाव ( प्रतिनिधी ) – शहरातील संभाजी चौक येथील मातोश्री हाईट्स अपार्टमेंटमध्ये गुरुवारी सायंकाळी साडेसात वाजेच्या सुमारास अपघाती प्रकार घडला, ज्यामध्ये तापी पाटबंधारे महामंडळ विभागात अधीक्षक अभियंता म्हणून कार्यरत अरुण बाबूराव ढवळे (वय ४०, रा. संभाजी चौक, महाबळ) यांनी आपले प्राण गमावले. घटनेनंतर रामानंद नगर पोलीस ठाण्यात अकस्मात मृत्यूची नोंद करण्यात आली आहे.
अरुण ढवळे हे पत्नी आणि दोन मुलांसह अपार्टमेंटमध्ये वास्तव्यास होते. गुरुवारी सव्वासात वाजेच्या सुमारास चौथ्या मजल्यावरून पडल्यामुळे ते गंभीर जखमी झाले. अपार्टमेंटमधील रहिवाशांच्या लक्षात येताच त्यांनी तातडीने जखमी ढवळे यांना खासगी रुग्णालयात दाखल केले, परंतु उपचार सुरु असताना त्यांची प्राणज्योत मालवली.
तीन महिन्यांपूर्वीच त्यांच्या पदोन्नतीमुळे ते जळगावात आले होते आणि मातोश्री हाईट्स अपार्टमेंटमध्ये भाडेतत्वावर कुटुंबासह राहत होते. दुर्दैवी घटनेमुळे त्यांच्या कुटुंबावर दुःखाचा डोंगर कोसळला असून परिसरात हळहळ व्यक्त केली जात आहे. पोलिस घटनास्थळी तपास करत आहेत आणि अपघाताचा नेमका प्रकार स्पष्ट करण्यासाठी चौकशी सुरू आहे.
