अमळनेर (प्रतिनिधी) – अमळनेर शहर व परिसरात तब्बल २४ मोटारसायकली चोरणाऱ्या दोन कुख्यात चोरट्यांनी पोलिसांच्या तावडीतून फिल्मी स्टाइलने पलायन करत खळबळ उडवली होती. मात्र तीन दिवसांच्या सातत्यपूर्ण पाठलाग, तांत्रिक माहिती आणि जंगलातील शोधमोहीमीनंतर अमळनेर पोलिसांनी दोघांनाही पुन्हा अटक करण्यात उल्लेखनीय यश मिळवले आहे.
हिम्मत रेहंज्या पावरा (३२) आणि अबीलाल उर्फ अंबादास बुरड्या खरडे (२७, रा. सातपिंप्री, ता. शहादा, जि. नंदुरबार) हे दोघे सराईत चोरटे काही दिवसांपूर्वी मोटारसायकल चोरीप्रकरणी पकडले होते. पोलीस कोठडी संपल्यानंतर न्यायालयाने त्यांना २८ तारखेपर्यंत न्यायालयीन कोठडी सुनावली होती. जळगाव कारागृहात जागा नसल्याने त्यांना नंदुरबार कारागृहात हलविण्याचे आदेश देण्यात आले आणि यासाठी पोलीस अमोल पंडित करडईकर व यशकुमार रवींद्र सपकाळे यांना वॉरंट देण्यात आले.
नंदुरबारकडे जात असताना धावडे गावाजवळ अचानक अंबादासने तब्येत बिघडल्याचे नाटक करत डोळे मिटले. पोलिसांनी हॉटेल नयनजवळ वाहन थांबवून पाणी आणल्यावर, बेडी काढल्याची संधी साधत तो झटका देत पळाला. त्या क्षणीच शेजारी बसलेला हिम्मत पावरा देखील बेडीसकट धावत शेतात अदृश्य झाला. पोलिसांनी दोघांचा पाठलाग केला, मात्र दोघेही चकवा देऊन पसार झाले.
घटनेनंतर पोलीस निरीक्षक दत्तात्रय निकम यांनी तात्काळ विशेष पथके तैनात केली. हेडकॉन्स्टेबल विनोद सोनवणे, सुनील तेली, भूषण परदेशी, अमोल करडईकर आणि मयूर पाटील यांच्या पथकांनी तीन दिवस सलग जंगलात शोध मोहीम राबवली. अंबादासचे नातेवाईक ताब्यात घेऊन चौकश्या सुरू झाल्यानंतर तो रंजाणे गावातील बहिणीकडे लपल्याचे समोर आले. पहाटेच सापळा रचून पोलिसांनी त्याला अटक केली.
दरम्यान दुसरा आरोपी हिम्मत पावरा हा शिंदखेडा तालुक्यातील विरदेल गावातील एका हॉटेलवर असल्याची गोपनीय माहिती मिळताच पोलिसांनी तात्काळ धडक दिली व त्यालाही तेथून जेरबंद केले.
दोन्ही आरोपींच्या अटकेमुळे शहरातील मोटारसायकल चोरीच्या मालिकेला मोठा आळा बसला असून पोलिसांच्या तत्पर कारवाईचे सर्वत्र कौतुक होत आहे.
