चहा विक्रेत्या होतकरू तरुणाचा भीषण अपघातात दुर्दैवी मृत्यू
पाचोरा/जळगाव (प्रतिनिधी ) – पाचोरा शहरातील कृष्णापुरी येथे राहणाऱ्या एका होतकरू तरुणाचा जारगाव चौफुली येथे झालेल्या भीषण अपघातात दुर्दैवी अंत झाला आहे. अज्ञात आयशर वाहनाच्या धडकेत हा अपघात झाला असून, या घटनेमुळे सोनार कुटुंबावर दु:खाचा डोंगर कोसळला आहे.
टपरी बंद करून परतत असताना अपघात
मयत तरुणाचे नाव सुनील उत्तम सोनार (वय २६) असे आहे. सुनील हा जारगाव चौफुली येथे चहाची टपरी चालवून आपल्या कुटुंबाचा उदरनिर्वाह करत होता. दररोजप्रमाणे मंगळवारी, १८ नोव्हेंबर रोजी रात्री ११ वाजण्याच्या सुमारास तो टपरी बंद करून आपल्या दुचाकीने घरी कृष्णापुरी येथे परत जात होता.
अज्ञात वाहनाची जोरदार धडक
जारगाव चौफुली जवळ पोहोचताच, एका अज्ञात आयशर वाहनाने त्याच्या दुचाकीला जोरदार धडक दिली. ही धडक इतकी भीषण होती की, सुनील गंभीर जखमी झाला. अपघातानंतर त्याला तातडीने जळगाव येथील शासकीय वैद्यकीय महाविद्यालयात उपचारासाठी दाखल करण्यात आले.
उपचारादरम्यान निधन
दुर्दैवाने, उपचारादरम्यानच बुधवारी १९ नोव्हेंबर रोजी मध्यरात्री १२.३० वाजता सुनीलचा मृत्यू झाला. बुधवारी सकाळी ११ वाजता शासकीय वैद्यकीय महाविद्यालयात शवविच्छेदन झाल्यानंतर मृतदेह नातेवाईकांच्या ताब्यात देण्यात आला.
सुनीलच्या पश्चात त्याची आई, भाऊ आणि वाहिनी असा परिवार आहे. कुटुंबाचा आधारस्तंभ असलेल्या मुलाच्या अकाली निधनाने परिसरात मोठी हळहळ व्यक्त होत आहे.
जळगाव तालुका पोलीस ठाण्यात या अपघातासंदर्भात अकस्मात मृत्यूची नोंद करण्यात आली असून, पोलीस अज्ञात आयशर वाहनाचा आणि चालकाचा शोध घेत आहेत.
