जळगावात छत्रपती शिवाजी नगर येथे घडली होती घटना
जळगाव (प्रतिनिधी) :- येथील छत्रपती शिवाजी नगर परिसरात भरधाव ट्रकने दिलेल्या भीषण धडकेत जखमी तरुणाचा उपचारादरम्यान महिन्याभराने मृत्यू झाला आहे. याबाबत जळगाव शहर पोलीस स्टेशनला गुन्हा दाखल असून मृत्यूप्रकरणी नशिराबाद पोलीस स्टेशनला प्राथमिक नोंद करण्यात आली आहे.
चैतन्य गोविंद ताम्हणकर (वय ४०, रा. छत्रपती शिवाजी नगर, जळगाव) असे मयत तरुणाचे नाव आहे. ते आई, वडील, मोठा भाऊ यांच्यासह राहत होते.मागील महिन्यात दि. १९ सप्टेंबर रोजी ते सकाळी साडेदहा वाजता मित्रासह बुलेट दुचाकीने घरी जात असताना त्यांना गॅस सिलेंडर वाहणाऱ्या भरधाव ट्रकने जबर धडक दिली होती. या धडकेत चैतन्य ताम्हणकर हे गंभीर जखमी झाले होते. तर मित्र किरकोळ जखमी होते. याबाबत जळगाव शहर पोलीस स्टेशनला गुन्हा दाखल करण्यात आला असून संबंधित ट्रकचालकावर कारवाई केल्याची माहिती पोलिसांनी दिली.
दरम्यान, जखमी चैतन्य ताम्हणकर यांच्यावर खाजगी रुग्णालयात उपचार सुरु होते. उपचारादरम्यान, बुधवारी दि. २२ ऑक्टोबर रोजी पहाटे सव्वा बारा वाजता त्यांची प्राणज्योत मालवली. याबाबत नशिराबाद पोलीस स्टेशनला मृत्यूची प्राथमिक नोंद करण्यात आली आहे.
