जिल्ह्याची प्रतिमा उंचावण्याचा निर्धार
जळगाव (प्रतिनिधी) : जळगाव जिल्ह्याचे जिल्हाधिकारी म्हणून नियुक्त रोहन घुगे (भाप्रसे) यांनी गुरुवार दि. ९ ऑक्टोबर रोजी जिल्हाधिकारीपदाचा पदभार स्वीकारला. यावेळी जिल्ह्याची प्रतिमा उंचावण्याचा निर्धार त्यांनी केला.
माजी जिल्हाधिकारी आयुष प्रसाद यांची बदली नाशिक येथे झाली असून त्यांच्या जागी शासन आदेशान्वये रोहन घुगे यांची नियुक्ती करण्यात आली आहे. पदभार स्वीकारताना अपर जिल्हाधिकारी श्रीमंत हारकर व निवासी उपजिल्हाधिकारी वैशाली चव्हाण आदी उपस्थित होते. रोहन घुगे हे जिल्हा परिषद, ठाणे येथे मुख्य कार्यकारी अधिकारी म्हणून कार्यरत होते. त्यांच्या नेतृत्वाखाली ठाणे जिल्हा परिषदेला डिजिटल प्रशासन, शिक्षण, आरोग्य व ग्रामीण विकास या क्षेत्रात उल्लेखनीय यश मिळाले असून ‘कार्यालयीन मूल्यमापन – १०० दिवसांचा कृती कार्यक्रम’ अंतर्गत राज्यात प्रथम क्रमांक प्राप्त झाला आहे.
