जळगाव एलसीबीसह भुसावळ शहर पोलिसांची कामगिरी
भुसावळ ( प्रतिनिधी ) – तालुक्यातील कंडारी परिसरात रविवारी दि. ५ ऑक्टोबर रोजी रात्रीच्या सुमारास १० ते ११ वाजेच्या दरम्यान किरकोळ वादातून तरुणाचा धारदार शस्त्राने खून करण्यात आला. पोलिसांनी अवघ्या काही तासांत सर्व संशयित आरोपींना अटक केली आहे.
या हत्येत मृत झालेल्या तरुणाचे नाव जितेंद्र राजेंद्र साळुंखे (कोळी, वय ४०, रा. गेंदालाल मिल परिसर, जळगाव) असे आहे. जितेंद्र हातमजुरी करून पत्नी आणि तीन मुलांसोबत आपला उदरनिर्वाह करत होता. जितेंद्र हा जळगाव शहरातील तीन परिचित व्यक्तींसोबत भुसावळ तालुक्यातील कंडारी गावात एका वैयक्तिक कामानिमित्त गेला होता. रात्री उशिरा चौघेही एका हॉटेलवर बसून मद्यपान करत असताना त्यांच्यात काही किरकोळ कारणावरून वाद सुरू झाला. वाद काही क्षणांतच चकमकीत परिवर्तित झाला आणि तिघा आरोपींनी मिळून जितेंद्रवर धारदार शस्त्राने वार केले.
जखमी अवस्थेत त्याला तातडीने भुसावळ येथील खाजगी रुग्णालयात दाखल करण्यात आले, मात्र डॉक्टरांनी तपासणीअंती त्याला मृत घोषित केले. पोलिसांनी तातडीने घटनास्थळ गाठून पंचनामा सुरू केला आणि आरोपींचा शोध घेण्यासाठी मोठी मोहीम हाती घेतली. घटनेची माहिती मिळताच डॉ. महेश्वर रेड्डी (पोलीस अधीक्षक, जळगाव) यांनी राहुल गायकवाड (वरिष्ठ पोलीस निरीक्षक, स्थानिक गुन्हे शाखा, जळगाव) यांना आदेश दिले.
स्थानिक गुन्हे शाखेचे पोलिस निरीक्षक राहुल गायकवाड यांच्या मार्गदर्शनाखाली एक विशेष पथक तयार करण्यात आले. या पथकात पीएसआय गोरे, पो.कॉ सिद्धेश डापकर, रतन गीते, सलीम तडवी, मयूर निकम, किशोर पाटील, उमाकांत पाटील, प्रशांत परदेशी, राहुल नरवाडे, हेमंत पाटील, ईश्वर पाटील आणि शनिपेठ पोलीस स्टेशनचे कर्मचारी योगेश साबळे यांचा समावेश होता. या पथकाने रात्रभर प्रयत्न करून गोपनीय माहितीच्या आधारे जळगाव शहरातील शिवाजीनगर परिसरातून दोन संशयित आरोपींना अटक करण्यात यश मिळवले.
यात राजू उर्फ बाबू अशोक सपकाळे (वय ३८, रा. कांती चौक, शिवाजी नगर, जळगाव) आणि मयूर उर्फ विक्की दिपक अलोने (वय ३२, रा. बारसे नगर, शिवाजी नगर, जळगाव) यांना अटक झाली. दरम्यान, भुसावळ शहर पोलीस निरीक्षक उद्धव डमाळे यांनी स्वतंत्र पथक तयार करून तिसऱ्या आरोपीचा शोध सुरू ठेवला. त्यांच्या मार्गदर्शनाखाली काम करणाऱ्या पथकाने तपासाच्या दिशेने निर्णायक हालचाल करत संशयित दीपक वसंत शंखपाळ (रा. कंडारी, ता. भुसावळ) या तिसऱ्या आरोपीला अटक करण्यात यश मिळवलं.
या कारवाईत भुसावळ शहर पोलीस ठाण्याचे अधिकारी आणि कर्मचारी यांनी देखील महत्त्वाची भूमिका बजावली. दोन्ही पथकांनी रात्रभर अथक परिश्रम घेऊन तीनही आरोपींना ताब्यात घेतले आहे. भुसावळ शहर पोलीस ठाण्यात या प्रकरणी खुनाचा गुन्हा दाखल करण्यात आला असून पुढील तपास सुरू आहे. सर्व आरोपींची कसून चौकशी केली जात आहे.
