वावडदा (वार्ताहर) :- सामाजिक आणि विद्युत क्षेत्रातील उल्लेखनीय कार्याबद्दल महाराष्ट्र राज्य विद्युत वितरण कंपनी (महावितरण), वावडदा तालुका जळगाव कार्यालयात वरिष्ठ तंत्रज्ञ म्हणून कार्यरत असणारे दिनेश ईश्वरलाल पाटील यांना ‘राज्यस्तरीय समाजभूषण’ पुरस्काराने गौरविण्यात आले आहे. राजनंदिनी बहुउद्देशीय संस्थेतर्फे जळगाव येथे आयोजित करण्यात आलेल्या एका समारंभात हा सन्मान प्रदान करण्यात आला.
एरंडोल तालुक्यातील दापोरी येथील रहिवासी असलेल्या दिनेश पाटील यांनी त्यांच्या कार्यातून अनेकांना प्रेरणा दिली आहे. त्यांच्या याच महत्त्वपूर्ण योगदानाची दखल घेऊन राजनंदिनी बहुउद्देशीय संस्थेने त्यांना या प्रतिष्ठेच्या पुरस्कारासाठी निवडले. संस्थेच्या अध्यक्षा संदीपा वाघ यांनी कळविले की, दिनेश पाटील यांचे सामाजिक व विद्युत क्षेत्रातील कार्य अत्यंत उल्लेखनीय असून हे योगदान लक्षात घेऊनच त्यांना हा पुरस्कार प्रदान करण्यात येत आहे.
जळगाव येथे झालेल्या या पुरस्कार वितरण समारंभास प्रमुख अतिथी म्हणून डॉ.महेंद्र काबरा, शालिक मालकर आदी मान्यवर उपस्थित होते. दिनेश पाटील यांना ‘राज्यस्तरीय समाजभूषण’ पुरस्कार प्रदान झाल्याबद्दल सामाजिक कार्यकर्ते सुमित पाटील यांच्यासह वावडदा आणि दापोरी परिसरातील नागरिकांनी त्यांचे हार्दिक अभिनंदन केले आहे.
