जळगाव तालुक्यातील दापोरा येथील घटना
जळगाव ( प्रतिनिधी ) – तालुक्यातील दापोरा येथे राहत्या घरी काम करत असताना एका तरुणाला विजेचा जबर धक्का लागून त्याचा मृत्यू झाल्याची घटना गुरुवारी २५ सप्टेंबर रोजी सकाळी १० वाजता घडली आहे. या संदर्भात जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
मयूर किशोर काळे (वय-३०, रा. दापोरा ता.जळगाव) असे मयत तरुणाचे नाव आहे. मयूर हा आई-वडील, भाऊ पत्नी आणि एक मुलगी यांच्या सोबत जळगाव तालुक्यातील दापोरा गावात वास्तव्याला होता. शेतीचे काम करत उदरनिर्वाह करत होता. दरम्यान काही महिन्यांपासून गावात त्यांच्या घराचे बांधकाम सुरू आहे. नेहमीप्रमाणे गुरुवारी २५ सप्टेंबर रोजी सकाळी १० वाजता मयूर हा बांधकामाच्या ठिकाणी गेला होता. त्यावेळी काम करतांना अचानक वीजेचा धक्का बसला आणि त्यात तो गंभीर जखमी झाला. ही बाब शेजारी राहणाऱ्या काही तरूणांच्या लक्षात आल्याने धाव घेऊन त्याला उचलून जळगाव येथील शासकीय वैद्यकीय महाविद्यालयातील दाखल केले.
यावेळी वैद्यकीय अधिकारी यांनी तपासणी केल्यानंतर मयत घोषित केले. मयूरचा मृत्यू झाल्याचे कळल्यानंतर त्याचे वडील आणि भाऊ यांनी मोठा आक्रोश केला होता. या संदर्भात जळगाव तालुका पोलीस ठाण्यात अकस्मात मृत्यूची नोंद करण्यात आली आहे. घटनेमुळे दापोरा गावात शोककळा पसरली आहे.
