जळगाव शहरातील बहिणाबाई चौकातील घटना
जळगाव (प्रतिनिधी) :- शहरातील संत निवृत्ती नगरात राहणाऱ्या व बहिणाबाई चौधरी उद्यानाच्या चौकात हॉटेल रोनक येथे हॉटेल मालकाने हॉटेलमध्येच गळफास घेवून आत्महत्या केल्याची धक्कादायक घटना सोमवारी १५ सप्टेंबर रोजी मध्यरात्री दीड वाजता समोर आली. आत्महत्या करण्याचे कारण अद्याप समोर आलेले नाही. याबाबत जिल्हापेठ पोलीस ठाण्यात अकस्मात मृत्यूची नोंद करण्यात आली आहे. घटनेमुळे खळबळ उडाली असून त्यांच्या खिशात सुसाईड नोट मिळून आली आहे.
आशिष मधुकर फिरके (वय ४८ रा. सांगवी ता. यावल ह.मु. संत निवृत्ती नगर, जळगाव) असे मयत हॉटेल व्यावसायिकाचे नाव आहे. आशिष फिरके हे पत्नी, दोन मुले आणि आई याच्यासोबत संत निवृत्ती नगरात वास्तव्याला होते. हॉटेल चालवून ते कुटुंबियाचा उदरनिर्वाह करत होते. त्यांचे रिंगरोडवर बहिणाबाई चौकात रौनक नावाचे हॉटेल आहे. सोमवारी दि. १५ सप्टेंबर रोजी मध्यरात्री दीड वाजेच्या सुमारास आशिष फिरके हे हॉटेलमध्ये एकटे असतांना त्यांनी हॉटेलमध्येच दोरीने गळफास घेवून आत्महत्या केली. हा प्रकार उघडकीला आल्यानंतर रात्री जिल्हापेठ पोलीसांनी घटनास्थळी धाव घेतली. पंचनामा करून मृतदेह शासकीय वैद्यकीय महाविद्यालयात दाखल केले. यावेळी वैद्यकीय अधिकारी यांनी तपासणी केल्यानंतर मयत घोषीत केले. त्यांच्या खिशात सुसाईड नोट आढळली असून ती पोलिसांनी जप्त केली आहे. याप्रकरणी जिल्हापेठ पोलीस ठाण्यात अकस्मात मृत्यूची नोंद करण्यात आली आहे. पुढील तपास जिल्हापेठ पोलीस कर्मचारी करीत आहे.
