अमळनेर येथील घटना, महिलेवर जादूटोणाविरोधी कायद्यान्वये गुन्हा दाखल
अमळनेर ( प्रतिनिधी ) – मुलाचे लग्न जमवून देईन, पैसे दुप्पट करून देईन आणि सोन्याचे दागिने काढून देण्याचे आमिष दाखवत एका महिलेने १८ लाख रुपयांत फसवल्याची घटना शहरातील बंगाली फाइल भागात फेब्रुवारी ते जून महिन्यादरम्यान घडली. या महिलेविरुद्ध जादूटोणा कायद्यानुसार अमळनेर पोलीस स्टेशन येथे गुन्हा दाखल करण्यात आला आहे.
राजेंद्र नारायण माळी (रा. रामवाडी, बंगाली फाइल) यांनी फिर्याद दिली आहे. दि. १२ फेब्रुवारी २०२५ रोजी त्याची आई भटाबाई माळी ही महादेव मंदिरात पूजेसाठी गेली होती. त्यावेळी तेथे तिला मंगला पवार ही भेटली. तिने मुलाचे लग्न जमवून देण्याचे आम्हीच दाखवून तसेच इतर आमिषे दाखवली. त्या पूजेसाठी २५ हजार रुपये मागितले. त्याच दिवशी रात्री ११ वाजता मंगलाबाई त्यांच्या घरी गेली व त्यांना घराच्या मागील भागात सोन्याच्या घागरी असल्याची माहिती दिली. मात्र ते काढून देण्यासाठी आणखी साडेचार लाख रुपयांची मागणी केली. त्यानंतर माळी यांनी हे पैसे दिले. हेच पैसे मंगलाबाई पवार हिने त्यांच्या घरात धान्याच्या कोठीत ठेवल्याचा बनाव केला. असाच प्रकार वारंवार होत राहिला, एकूण १४ लाख रुपये घेतले आणि प्रत्येकवेळी एक तांब्याची घागर काढून आणली.
पुन्हा मार्च महिन्यात तिने अडीच लाख रुपये देवीच्या मुखवट्याजवळ ठेवायला लावले. तेही पैसे ती घरात एकटी जाऊन धान्याचे कोठीत ठेवून आल्याचे सांगितले. मात्र ती पैसे कोठे ठेवत होती हे घरच्यांना देखील माहीत नव्हते. जून महिन्यात तिने पुन्हा सोन्याच्या घागरी आणि सोन्याची देवीची मूर्ती काढण्यासाठी पूजेचे साहित्य लागेल म्हणून दीड लाख रुपये मागितले. घरमालकाचे पैसे संपले आणि त्यांनी आम्हाला सोने, दुप्पट पैसे नको म्हणून आमचे पैसे कोठीतून काढून द्या, असे सांगितल्यावर मंगलाबाईने घरात पाच फणी नाग आहे. तुम्ही घरात जाऊ नका म्हणून मनाई केली.
त्यानंतर आणखी ८० हजार रुपये मागितले. त्यावेळी कुटुंबातील सदस्य दीपक माळी याने आरशातून पाहिले. तेव्हा मंगलाबाईने ८० हजार रुपये साडीत लपवले. त्यानंतर माळी कुटुंबाने घरातील धान्याच्या कोठ्या तपासल्या. त्यावेळी तेथे काहीच आढळून आले नाही. त्यानंतर राजेंद्र माळी याने दिलेल्या तक्रारीवरून मंगलाबाई पवार हिच्याविरोधात भारतीय न्याय संहिता कलम ३१८(४),३१८(२), ३१६(२) प्रमाणे तसेच महाराष्ट्र नरबळी व इतर अमानुष, अनिष्ट व अघोरी प्रथा व जादूटोणा प्रतिबंध व उच्चाटन अधिनियम २०१३ चे कलम ३ प्रमाणे गुन्हा दाखल करण्यात आला आहे.
