जळगाव शहरातील हरिविठ्ठल नगर येथील घटना
जळगाव (प्रतिनिधी) : येथील हरिविठ्ठल नगर येथील रहिवासी महिलेने राहत्या घरी गळफास घेऊन आत्महत्या केल्याची धक्कादायक घटना शुक्रवारी दि. १२ रोजी दुपारी ४ ते ५ वाजेच्या सुमारास घडली. याप्रकरणी रामानंद नगर पोलीस स्टेशनला अकस्मात मृत्यूची नोंद करण्यात आली आहे.
अनिता किरण कोळी (वय ३७, रा. हरिविठ्ठल नगर, जळगाव) असे मयत विवाहित महिलेचे नाव आहे. त्या पती, १ मुलगा, १ मुलगी व पुतणी यांचेसह राहत होत्या.(केसीएन) अनिता यांचे पती डिश केबलचे काम करून परिवाराचा उदरनिर्वाह करीत आहेत. दरम्यान, शुक्रवारी दुपारी पती किरण हे कामाला तर मुले शाळेत गेली होती. दुपारी ३ वाजता घराजवळच अनिता कोळी या बसल्या होत्या. त्यानंतर त्या घरात गेल्या. काही वेळाने त्यांनी राहत्या घरी गळफास लावून घेत आत्महत्या केल्याची घटना घडली.
कुटुंबीय घरी आले तेव्हा त्यांनी मृतदेह पाहताच एकच आक्रोश केला. नागरिकांच्या मदतीने अनिता कोळी यांना शासकीय वैद्यकीय महाविद्यालय व रुग्णालयात दाखल केले असता तेथे वैद्यकीय अधिकाऱ्यांनी तपासून मयत घोषित केले.(केसीएन)यावेळी रुग्णालयात अनिताच्या परिवाराने मन हेलावणारा आक्रोश केला. घटनेमुळे हरिविठ्ठल नगर परिसरात शोककळा पसरली आहे. रामानंद नगर पोलीस स्टेशनला अकस्मात मृत्यूची नोंद करण्यात आली आहे.
