जळगावात शिव कॉलनी, शिरसोली रस्त्यावरील घटना
जळगाव (प्रतिनिधी) :- शहरातील शिव कॉलनी परिसरात पैशांच्या वादातून एका तरूणाला डोक्यात दगड मारून गंभीर दुखापत केल्याची घटना शुक्रवारी २२ ऑगस्ट रोजी सकाळी ११ वाजता घडली आहे. याबाबत शनिवारी २३ ऑगस्ट रोजी रामानंद नगर पोलीस ठाण्यात तीन जणांविरोधात गुन्हा दाखल करण्यात आला आहे.
अथर्व महेश मुंदडा (वय २१ रा. द्रौपदी नगर, जळगाव) जखमी तरुणाचे नाव आहे. शुक्रवारी २२ ऑगस्ट रोजी सकाळी ११.३० वाजेच्या सुमारास पैशांच्या वादातून झालेल्या भांडणात संशयित आरोपी प्रथमेश तायडे (रा. वाघ नगर), दुर्गेश पाथरकर (रा. दुध फेडरेशन परिसर) आणि अभिषेक कुलकर्णी (रा. बळीराम पेठ, जळगाव) या तीन जणांनी अथर्व मुंदडा याला शिवकॉलनी परिसरात शिवीगाळ करत मारहाण केली. तसेच, दुचाकीवर बसवून नेत शिरसोली रोडवरील जैन व्हॅली परिसरात मारहाण केली. जखमी झालेल्या अथर्वला जळगावातील शासकीय वैद्यकीय महाविद्यालयात उपचारार्थ दाखल करण्यात आले. याप्रकरणी मारहाण करणारे तिघांविरोधात गुन्हा दाखल करण्यात आला. पुढील तपास पोहेकॉ प्रशांत पाठक हे करीत आहे.
